Ominista onkulu yelongo Katrina Hanse-Himarwa, okwa pewa egumbo lye lyaaluhe Olyomokaya koMariental.

Hanse-Himarwa (57) okwa hulitha mepipi lyomimvo iiwike iyali ya piti moWindhoek.

Omupresidente gwoshilongo Nangolo Mbumba okwa tanga Hanse-Himarwa onga kwali omuvali, 

omumwayinathana, kuume, omulongi omukwatelikomeho nokwali omagano kukehe gumwe a li pooha dhe.

“Aanamibia oyendji oyuuvite uuntsa sho ya kala noku longa pamwe na Hanse-Himarwa oshoka oya tseya oshindji okuza miilonga ye,” Mbumba ta ti ngaaka.

Ta gwedha po kutya Hanse-Himarwa okuna uukwatya wa pumba uuwanawa no itau yelekwa noyendji, e na ohole nombili na kehe gumwe oshowo esimaneko neitaalo lya kola.

Mbumba ta ti Hanse-Himarwa okwa kala e na ombepo ombwaanawa yuukumwe oshowo yokuhumitha noku tula  Namibia pondondo ombwaanawa.

“Hanse-Himarwa okwa kala e na uuyuki, uuthike pamwe, elongelo kumwe no kwa kala ta gandja oshiholelwa oshiwanawa shokulela pethimbo lye,” ta tangwa ngaaka.

Momumvo 2015 okwali a tothwa mo a ninge ngoloneya gwoshitopolwa shaHardap, omanga inaa ulikwa a ninge minista gwelongo, oshilonga shoka a longo sigo omumvo 2019.

Okwa kala wo amushangandjayi gwewawa lyaakiintu oshowo oshilyo shongunduomutima yoSwapo. 

Hanse-Himarwa okwa kala amushangandjayi gwoshitayi shongundu yoSwapo moMariental okutameka momumvo 1996 sigo omo1997.

Natango okwali wo omukuluntu ta ungaunga noshimaliwa moshitayi moka.

Nakusa Hanse-Himarwa okwa thigi ko omusaane gwe Gennoh Himarwa aanona yane naakuluntu ye.  –vkaapanda@nepc.com.na