OSHAKATI – Aakwashigwana opamwe naalongi okuza koombinga noombinga moshilongo oya holola euvo molwa etidho miilonga lyomulongisikola Petrus Ndeutila.
Ndeulita ngoka a li ha longo poAshiyana Primary School mOngwediva, okwa lalekwa miilonga omwedhi gwazi ko konima anuwa a monika ondjo sho a yelulitha okanona kosikola oshipundi uule wo wili momumvo 2021.
Omaupyakadhi posikola yaAshiyana oga tameke nale pokati kaalongi nomukuluntusikola. Momumvo 2022, omukuluntusikola okwa li a indikwa uule womasiku opo kaa ye molugumbo lwosikola kaalongi molwa uupyakadhi wa li pokati ke naalongi ye. Pethimbo lyomasiku giikolokosha mbyoka yamwe yomaalongi oya li ya ulike omukuluntusikola omunwe kutya ota longitha ombepo yuulodhi sho anuwa posheelo sho mbelewa ye pwa adhika pwa tilwa oshikunguluki sha fa omagadhi. Anuwa omukuluntusikola esiku ndjoka okwa yi mosikola moka a li a monika ta endagula, shoka shaaha li pamalombwelo ngoka gali ga tulwa po kaalongi. Aalongi naavali paife otaya ulike wo ominwe komunambelewa omukuluntu gwelongo Sanet Steenkamp, anuwa oya longela kumwe nomukuluntusikola opo Ndeutila a kanithithe iilonga.
Kongundu yoWhatsApp ndyoka ya totwa, ngaashingeyi aantu oyendji oya gongele oshimaliwa shoku kwata hahende ngoka ta kalele po Ndeutila mompangu.
Okwa hololwa omauvo nayi ga yooloka, taya nyenyeta kutya etokolo lya ningwa okukutha omulongi miilonga kali na uuyuki oshoka okanona hoka ina ka nyengwa kolutu ihe okatumbithwa oshipundi onga egeelo sha landula shoka ka ningi.
Pethimbo ndika lyoshikumungu shaNdeutila, aalongi ya waiminwa kaalongi oyakwawo yokoosikola dhilwe nokaakwashigwana oya nyola kutya, otaku longekidhwa omunyanyo gwopambili opo Ndeutila a shune miilonga.
Ashike Steenkamp okwa ti, ye ita vulu okutya ko sha koshiningwanima shika, uuyelele wa gwedhwa po otau zi kombelewa yomuprima minista.
“Sho taku ti, onda kala mekwatathano ewaanawa nomukulutusikola kwali posikola mpoka notwa kundathana okukanithila omulongi ngoka iilonga kadhi shi dho shili. Ondi na aalongisikola oyendji mongodhi yandje onkene kape na sha puka okukala mekwatathano nomukuluntu sikola,” ta po pi ngaaka.
Momushangwa gwa pitithwa kehangano lyi lile po aalongi lyoNamibia National Teachers Union (Nantu) , ehangano olya ti olili metifa lyoshipotha shoka no taya kambandhala ngaashi taya vulu okukondjela omulongi nguka.
“Ota tu indile aalongi ayehe ya mange uukumwe pethimbo ndika, kohi yoshipalanyolo ngele gumwe a gumwa a muhe omwa gumwa,” ombaapila ya leshwa ngaaka.
Omupresidente gwongundu yoPopular Democratic Movemebt McHenry Venani okupitila komalungula “Twitter” okwa nyola kutya omulongi ngoka ngele shili okwa lalekwa miilonga sho a tumbitha okanona oshipundi ka shili mondjila, okwa pumbwa okushu na miilonga.
“Aalongwa oya gamenwa sha pitilila nosha etitha aanona ya ninge shoka ya hala mongaashingeyi,” Vanaani a nyola ngaaka.
Omukuluntu gwelongo moshitopolwa shaShana Pauline Shapumba sho kwali a pulwa opo a tye ko sha koshinima shoka okwa ti, kena uuyelele mu sho, ye natango kali mo mombelewa ethimbo ndyoka.
Ndutila naye sho a kala noku dhengelwa ethimbo, nethimbo komutoolinkundana opo atyeko sha kehokololo huka ka kwali ta kutha po ongodhi ye.
Omulongi sikola gumwe ngoka edhina lye inaa hala lyi tumbulwe omolwa omatompelo geli po okwa ti, okuli ompinge naashoka sha tokolwa kuuministeli wa wo.
“Omolwa shike omulongi ngoka a lalalekwa milonga kaapena elondondho lya sha, okwa lalekwa sha ikwatelelwa koshike? ta pula ngaaka.
Ta ti, okutidhwa miilonga hako ekandulepo lyuupyakandhi, ihe e yete po lyuupyakandhi.
Ta gwedha po kutya omulumentu ngoka oku na aakwanezimo teya sile oshimpwiyu, ihe nena okwa kanitha iilonga pwaana etompelo lya kola.
“Okanona hoka okalemanekwa, okadhengwa? Ya kwetu natu tale ni oombinga adhihe. Omulongi okwa gandja ashike egeelo komulongwa gwe,” ta nyenyeta ngaaka.