Ehangano lyomakwatathano gopangodhi lyoMTC pamwe nehangano lyoMVA Fund okupitila moproyeka yokuyambidhindha oosikola moshilongo, oga yambindhindha osikola Tsumeb Primary okuyitungila oongulu dhogushu yoshimaliwa oomilliona N$3.4.

Osikola Tsumeb ndyoka yi li moshitopolwa shaShikoto oya yambindhindhwa noongulu dhokulongelwa dhili hetatu, olambolotoli oshowo okangulu kokupungulila.

Ominista yelongo Anna Nghipondoka ngoka a gandja omatungo ngoka pambelewa okwa ti, eyambidhidho lya tya ngaaka, lyondjundo yi thike mpoka olye mu nyanyudha nolya tsakaneka epangelo oondjilakati.

“Elongo olya simana, olyi na okusimanekwa. Ngele okanona ina ya mona elongo nena nonkalamwenyo yawo ohayi kala ya mbwalangandja. Mongashiingeyi ku na mpoka to yi kokule kuu na iipatululo yelongo,”ta popi ngaaka.

Ta ti, uuministeli otawu tsikile okukondjela oosikola ndhoka dhi li lela mompumbwe, opo dhi mone omayambidhidho dhi wape okugandja elongo ewanawa kaalongwa.

Omukuluntusikola posikola Tsumeb Petrina Shafewa okwa ti, oya kala nokulongela aalongwa yawo mongundu dhaali monkalo tayi hokitha omanga ya thinana mo, ihe nena oya mono oongulu oompe.

“Otandi pandula nomwenyo tagu hambelele oshoka aalongwa posikola mpaka oyo aanelago. Aalongwa ohaya ilongo ya mana mo uuna taya longelwa momahala taga hokitha noga yela,” ta popi ngaaka.

Omukuluntu mendiki lyo-MTC Tim Ekandjo esiku ndyoka okwa li a fatulula kutya oya yambidhidha ngaaka okugwanitha po iinakugwanithwa yu uvanekele uuministeli welongo.

“Onga ehangano lyo-MTC, inatu hala okumona aalongwa taya longelwa mootenda, mehala itaali hokitha, ihe otwa hala aalongwa ye li moongulu oshowo momahala taga gandja wo natango omukumo kaalongwa ya ilonge ya mana mo,” ta popi ngaaka.

Ekandjo esiku ndyoka okwa li natango a kumagidha aalongwa posikola mpoka ya tsikile okwiilonga ya mana mo, opo natango nayo ya tsikile okuyambidhidha noompumbwe taya ka pula monakuyiwa.

Omukuntuwiliki mehangano lyoMVA fund Rosalia Haufiku okwa ti, ohashi nkundipaleke omadhiladhilo gaalongi oshowo aalongwa uuna taya longele nenge taya longelwa momahala itaaga hokitha.

“Elongo ohali kala lya pama aluhe ngele omulongi nomulongwa ye uvite nawa, oshowo ombili. Ngaashi naana omahangano ngaka ga yambidhidha nena nongulu dhoka omolwohokwe nesimano gena nelongo,”ta fatulula ngaaka.

Aalongi  naalongwa  oya pandula omahangano ngoka gaali taya ti  shoka ga longo osha simana go naga tsikile oku shi ningila oosikola dhilwe moshilongo dhi li mompumbwe.

– vkaapanda@nepc.com.na