Lahja Nashuuta

Zambiab di !Nakaǂnôa !Haosi ǂNûs Gowa-aos, Malungo Chisanganos ge Namibiab Parlements !nâb surigu ǀguitikosiba ra ai!gû ǀgaus xa kaise go ǂkhî kaihe. ǁÎs noxopa nau !hūgu xas tsîna a kōǁnâhe ǁkhāse go mû xū-i ge, ǂgiǂgosi !nandi surigu ǀguitikōsiba hoatsama ra aimâisa, !gōsase, ǂgaeǂgui ra Swaposa, in parlements !harib ai surigu ǀguitikōsiba sī!nâse. 

Chisanganos ǁîs !aroma kaise go mâǂoaba si se ra !gawaǀî-i ge, Swapos di !hūǂhanub hîa 50/50 ǂnûǁkhaebas !aroma soa-e ra kuruba. ǁKhātis ge nau hâ ǂgiǂgosi !nandi tsîn ǁîdi ǀgauga ūhâ, surigu ǀguitikōsiba oe-ams !aroma !khaisa ge ǂan. 

“Anuse ra mûsen !khais ge, Namibiab 50%gu xa a !nāsa tarekhoede parlements !nâ ūhâsa, ǁîde xu di !nāsade ǂgaeǂguis !harode ǂhanub !nâs tsî ǂgiǂgosi !nandi !nâ ūhâse,” tis ge ge mî. ǁNāti i ǂans hîan ge Parlementsa xu a !khō!oas ge ra ǁgau, 

Namibiab tarekhoedi ǂnûǁkhaebas parlements !nâs ge ǂguro !Haosi ǂNûs (1990-1994) !nâ koro isa xu !nani-ǁî parlements (2015-2020) dis !nâ 48 kose a ǂharosa. 

Nē kurib !nâb ge Namibiab 50/50 surigu ǀguitikosiba !Haosi ǂNûs !nâ go sī!nâ. Nēsi hâ parlements di 104 ǁanina xu di ge 52 a tarekhoe tsî nau 52ga a aorekhoe. Hoa !Hūbaisi Surigu ǀGuitikōsib !Nurib 2024ǁî kurib dib ra mîsa !oab ge Namibiaba hoa !hūbaisise ǂguro disi !hūgu surigu -ǁaegu ra hâ ǀguitiko-o!nâsib !gâise ra ai!gûgu ǁaegu hâsa. 

Chisanganos ge ge mî, nausab Zambiab di !hūǂhanuba tarekhoedi nî !gôa!gâhes di ǂhâǂhâsasiba ra aimâi, xaweb surigu ǀguitiko-o!nâsiba noxopa kai ǁgoaǂuise īsa. 

Chisanganos hîa ǁîs di gurisa ǁanin Zambiab parlements din ǀkha wekheba ge !khōǂgā hâ i sarisa !Haosi ǂNûs Namibiab dis tawa ge ūhâ is ge, New Erab ǀkhas ge ūhâ i dî!nâǁgamǁares !nâ ge mî, Zambiab di 167 parlements ǁanina xu di 16 (15%) a tarekhoe tsî !gau ra ǀammi hoaba aorekhoegu ǂnûǁkhaeba !khaisa. 

Tarekhoedi ge 86%gu ǁnaetisa sîsen!harodi dis !nâ hâ tsî 13%gu di di ǀguide ǀgapi !harodi !nâ hâsa. ǁÎs di ǁkhoreb ge ǁîn !hūb di ǂgiǂgosi !nandi tsîn ga mâtikō !gôagu di surigu ǂnûǁkhaebaden nî ūhâsa a mîmâi o.