Omundu nongoro ye mbya nangarasi vya kamuna eha rarwe kOtjozondjii okuza nokurambwa mOtjomise momurungu wOalte Feste pu va kaveta otjiuru mewe tjinga komurungu yo mayandero womueze imbwi amave sokuzapo poruveze nai pu ve ri mOtjozondjii.
Ongoronomundu mo 2013 otji ya isapewa momurungu wOalte Feste pu ya ri orusenina kehi yonyengo yovature tjiva va Tjomuise muuo mu muna ozondekurona zOtjiṱiro Otjindjandja.
Mokutja oyo i yandja ondangu nokuzemburuka ovarwe vEhi rOvandoitji rohuuurire motjirwa tjavo ku nOvaherero. MOnamibia ekutuke ndji he ri ombuniko ombwa kaparukaze.
Komurungu wa nao oyo ya ri momurungu wombongo ndji ri meṋe yOtjikunino Tjondjuwo Yozoveta mOtjomuise, pu ya isapewa okutwarewa kOalte Feste okuza mo 1912 tji ya kutjururwa onguyu.
Omuini wonganda yomariro mOtjozondjii indji Anstadt, popezu ure oyo nai pu iri, Norbert Sadlowski, ma ku zu omupataṋe wokutja kwa ri Otjiṱiro Otjindjandja tjOvaherero. Omuṱize wotjihuro tja Tjozondjii nOtjirata tjotjihuro ma ku zu nai ve ri motjihungiriro ohunga notjiṋa hi.
Ngunda ape ri nao ehika rovanane vombazu vOvakwena, ousupi ONTLA nOuhonapare wOmbazu wOvaherero kehi yOmbara Otjitambi Mutjinde Katjiua, mau ningire Omihoko Omikutasane okuritjakaṋa nokutjayera ondando yohoromende ya Namibia yokuyamburura oruveze rOtjiṱiro Otjindjandja tjOvakwena nOvaherero mOkakoverua.
Mburi omutjemo wa Suramazeva oto tji twe riyarikaṋa korutu rOmihoko Omikutasane ndu rwisa Ombangu, ousupi OCERD.
Tjinene amatu pirura ondando yokuneneparisa otjikuturiro tjovitendeze mOkakoverua mene youruveze orunamakuruhungi indui Oshark Isaland, oro nduri ehuno rovaṱi vOtjiṱiro Otjindjandja.
“Ondunge yokutandavarisa otjikuturiro kai nokuṱuna kOshark Isaland porwe nungwari wina mai tombo oruveze romasuviro omasenina wOvakwena nOvaherero ovengi mba ṱira mbo,” otutu twi twa raisa nao morutuu kozombuze omayuva tji ya ri 11 komueze mbwi.
Mu ma tu ningire okomiti okutara motjiṋa hi tjimanga mena romuano mbu matji ṱunu kekuruhungi enene ra Namibia mokuzemisa Otjiṱiro Otjindjandja.
Wina mokutja oviwaṋa mbi mavi ṱunwa i yondando ndji kavi ya rora okuraerwa kaparukaze.