!Hū!nāsi ǂNuwiǁkhāsib ǀAwemā!nans Namibiab dis (NACN) ge ǁîs di ǁgamǁare saridi hîas !hūb a ǂhabase ge ūhâ ide ge dītoa. 

Nē saridi di ǁgūbas ge, Namibiab ǂNuwiǁkhāsib ǂGaes di ǂHanumasa ǁkhawa kō!gâs tsî hui!nâ ra ǁgaragu tsî ǀgauga ǂgaekhâis ai ge hâ i. Nē saris hîa hoa 14 ǀkharigu Namibiab diga ge !khōǂgā hâ is tsî ǂKhoesaob !nâ a tsoatsoas ge, NACNs di ǁgūtsâdi, ǂnuwiǁkhāsib ǂgaesa !hūb !nâ marisise ǀgaiǀgai!nâs di !â ge i. Sîsenni nēb ge marisise UNESCO-Aschberg proxrammi xa ge mâ!gâhe.

 Nē saridi !nâs ge NACNsa ǂûǂûxa ǂâiǀgaugu tsî mîǂgāga ǀkhō-aon, ǁnae-aon, ǀnōǁnâ-aon, ǂnuwiǁkhāsib ǀkha a dīxūxa ǂnûiǂgādi tsî !âhuru-aona xu !hūb a ǂhabase ge !khō!oa. Nē ǀhaoǀhaosa ǂansa xu ra !âubasenhes ge, ǁkhawa nî kōhe ǂHanumas nî ǂâuǀoasasib !nâ namibiab di ǂnuwiǁkhāsib !âb ǂhâsin tsî ǁgoaǂuide oe-am !khaisa. 

ǂHôamāǂui-i !nâs  ge NACNs administrasis mûǂamaos, Gretta Gasparsa ge mî, ǁgamǁaredi tsî ǂâiǀgauga ǀgoragudi a NACNs di sîsenni sī!nâs !nâ a !amǂgāsa ǂhâǂhâsa xūn di ǀgui !khaisa, tsî ǂnuwiǁkhāsib khoen Namibiab dina ǂkhâ!nâ tsî ǀgaiǀgais ai a !ammâisasa. 

“ǁKhawa kō!gâ tsî !gâi!gâi!nâs Namibiab !Hū!nāsi ǂNuwiǁkhāsib ǂGaes di ǂHanumas 2005ǁî kurib disas ge a ǂhâǂhâsa dā!haro, hîa sîsenǂuiba a ǁgau ǁkhā tsî ǀgaisa sī!nâhesa ǁguiǂuiba ǂnuwiǁkhāsiba marisise a hui!nâ ǁkhā omkhâis !aroma. 

Saridi ge hoa ǀkharigu !nâ turab tsî ǁkhorexasib ǀkha ge !khō!oahe tsî sîsenǁareba ǂgomhe ǁoasase hoan ǂnuwiǁkhāsib !nâ a !ân, ǂgaiǀons ai !hao!nāi-aon, !hao!nāsib sîsenū-aon, !hao!nāsi ǂūsin !nâ ǁani hân, ǂhanuxoa-aon tsî mâ ǀgau-i ǀgui-i ais ka xawe ǂnuwiǁkhāsib !nâ a !âǀhuru-ao khoena xu gere mâǂoa. 

Mâ ǁgamǁare !âb hoab ge sâsa tsî turaba ra mâ soab supuse sa ǂâiǀgauba ǀgoragus diba gere mā. 

ǁKhātin ge ǁgoaǂuidi tsî ǁîdi !aroma a hâǁkhā oredi tsîn tsîna gere ǀgoraguhe tsî ǁîna xu !kharaga aoǁguiga gere ūhe,” tis ge Gasparsa ge mî. 

ǂKhamkhoesib di ǁhaos tsî ǁîn mûǂgāga ǀgoragus ge ǀgapise gere !gôa!gâhe, tsî ǁîs xōkhā ǀhûhâsigu di sîsenǁareb tsî nē saridi !nâ !âsa. 

“NACNs ge hoa !âhuru-aona buruxa sîsenǁareb tsî ǀguixasib nē ǁgamǁaredi !nâ !hūb a ǂhabase ǁhaos dib !aroma gangansa ra mā. 

Mîǂgāgu sadu digu ge ǁKhawa Kō!gâs nē ǂHanumas kai huib ase nî ī,” tis ge ge ǀamǀam.