OMUTHIYA – Omupresidente Nangolo Mbumba okwa pandula oilonga ya longwa komapendafule pef imbo lekondjelomanguluko.

Edi Mbumba okwe di popya Omaandaxa kefiku ledimbuluko lomapendafule kOmuthiya moshitukulwa shaShikoto.

Okwa kumaida oshiwana opo shi fimaneke omapendafule molwashi okwa longa oilonga ya fimana. Omudo keshe omafiku 26 Anguste, Namibia oha dimbuluka efiku lomapendafule okuyandja efimaneko nokutumbaleka omapendafule.

Oveleli vopapolitika veendodo da yooloka, ovaleli vopamifyuululwakalo novakwashiwana okwa va holoka momwaalu muhapu okudimbuluka efiku lomapendafule.

Omupresidente okwa ti ka kwa li shipu Namibia a mone manguluko. “Ngeno ka pali omapendafule ngeno Namibia ina manguluka,” ta ti.

Okwa ti omapendafule amwe okwa li eli kondje yoshilongo taa lwile emanguluko laNamibia.

Okwa weda po ta ti efiku lomapendafule ola fimana mondjokonona yaNamibia.

Omupresidente okwa ti Namibia oshilongo shi na ombili noukumwe molwashi osha manguluka paife.

Mbumba okwa popya ta ti konima yemanguluko epangelo ola etela oshiwana omayakulo popepi ngaashi okutunga eefikola noipangelo, okuyandjaneka omeva, okukondjia ondjala noshikukuta noshoyo omayakulo amwepo.

Okwa weda po ta ti epangelo ota li twikile okulwifa onghalo yoshikukuta noshoyo okulopotela ovanhu oikulya yoshikukuta.

Mbumba okwa lombwela oshiwana opo shi ye momwaalu muhapu okukahoolola neudo momafiku 27 Novamba.

“Ka hoololeni nombili pehe na omalipumu mumwe,” ta ti.

fhamalwa@nepc.com.na