Okudja omudo 2020 fiyo 2024 moshitukulwa shaHangwena omwa lopotwa ovanafikola ve dulife 2 100 va ninga omateelelo.
Edi oda popiwa kungoloneya waHangwena Sebastian Ndeitunga pefimbo kwa li ta yandje ouyelele kombinga yomayakulo oo aa etwa po kepangelo moshitukulwa shaye, oshivike sha dja ko kEenhana.
Ngoloneya okwa ti oshi li eshongo linene lovanafikola tava ninga omateelelo ve li peedula dishona. Okwa ti eshi otashi piyanake elihongo lovanafikola molwashi vamwe ova fiya po ofikola. Ndeitunga okwa popya yoo vali kombinga yomashongo oo e li moshitukulwa ngaashi oimbuluma ya londa pombada unene omwatonghonga noumbudi woimuna.
“Ounona ova ninga oihakanwa yokulongelwa ominyonena,” ta ti.
Okwa ti ombelewa yaya oya lopotelwa oibofa ihapu yovakwashiwana tava teya po eembola domeva odo da tungwa momikunda davo.
“Otuna omashongo eendjila dii noshoyo omhumbwe yomeva ashike epangelo ota li twikile okuyandjaneka omeva koshiwana,” ta ti. Ngoloneya okwa popya ta ti oshitukulwa osha didilika kombinga yoshikumungu shomahooli taa landifwa paumbudi kOshikango. Naashi osha eta oitaashi imwepo yomahooli i kale ya pata mOhangwena kombinga yOshikango. “Otuna omashongo onghalo yovanyasha vehe na oilonga moshitukulwa shetu,” a weda po.
Okwa weda po ta ti mOhangwena omu na omhumbwe yokapale komaundano kopashinanena.
Okwa ti oshitukulwa shaye osha taalela omashongo oikwafifo yokutonatela ovanhu ve na oulema noshoyo oshiwana shovayelele.
Ngoloneya okwa hokolola lopandula ta ti oshitukulwa shaye otashi xumu komesho ngeenge tashi ya pehongo lopombada molwashi paife omu na oiputudilo ya yooloka.
Okwa ti ovanafikola itava ka mona vali oixuna yokukafikola koushimba molwashi mOhangwena omu na oiputudilo ngaashi IUM, VTC noshoyo NUST.
Ndeitunga okwa ti ouministeli woukashike kookanhu nonghalo nawa yokaana otau twikile nokuyambidida ounona voukwanaluhepo neefiye omo 28900 ounona hava mono oshimaliwa shopendjela okudilila kepangelo.