Omukulunhu koshikondo shokukonakona oimbuluma moshitukulwa shaHangwena omupedu Commissioner Zachariah Amakali okwa koleka ta ti neudo ka pena ouyelele woumbangi wa yandjwa mekwatafano lefyo lomuhongifikola Natanael Thabo Nghihalwa. Okwa ti opolifi otai longo noudjuu okukonakona oshikumungu eshi molwaashi kape na oumbangi wa yela.

Nghihalwa weedula 39 okwa xulifa omudo wa dja ko momafiku 11 Novomba eshi vati a yashwa nondjebo.

Oshiningwanima osha ningilwa meumbo lavo efimbo loufiku momukunda Oshikwiyu moshitukulwa shaHangwena.

Otaku hokololwa kutya omulumenhu ou okwa dja pondingosho yaye i li mOmungwelume ndele ta i keumbo e ke likoshe. Opolifi oya hokolola tai ti omulumenhu ou okwa yashwa kuwalye molwaashi kape na ouyelele.

Okwe lituwa kumumwainamati a nangala   poshivelo shonduda yaye e li mekungu lohonde.

Efiku olo omalola otuwa yaNghihalwa okwe lituwa a tetwa nomakatana. Nghihalwa okwa li ta longele kofikola Oshali West Combined School.

Amakali okwa pula oshiwna opo shi holoke oku ka yandja ouyelele kombinga yefyo lomuhongifikola ou.

“Ouyelele owa fimana molwashi otau kwafele opolifi i longe noupu,” ta ti.

Umwe womumainamati waNghihalwa okwa ti opolifi itai longifa ouyuuki okukonakona oshibofa shefyo lomumwainamati. “Omudo wa dja ko okwa li pe na ouyelele kombinga yovafekelwa ovo vati va dipaa ondenge yange,” ta ti. Okwa ti paife opolifi oya mwene molwaashi kai na ko nasha.

-fhamalwa@nepc.com.na