Opopular Democratic Movement, ousupi OPDM, mai yarurakisa otjihungiriro tjOtjiṱiro Otjindjandja koupe ku no’horomende yEhi rOvandoitji okutjita ongahukiro kutja pe kare omerihekeneno wakatjotjiri okutuurungira motjisuta.  

Indwi irumwe roruyano rwOPDM ndoovazu kombunda yomatoororero wOperesindenda nouṋepo wombongarero yOtjiwaṋa mu Tjikukutu oyo ya taara nairire ohoromende. 

Membo rovita morutuu rotuyano twaro, omunane wotjira hi, ma tja ondanaukiro otjira ookoṋa ku tja hungama. 

OPDM itjimwe tjovira vyoporotika, tje he ri otjitenga, tjimwe mu imbi mbya tengere po okuraisa otuyano twatjo kovatoorore tji ye keturaisire kOkatima Muriro omayuva tji ya ri 25 ku Katjose.

Oyo mu i noturoto otuwondja notuyano kovatoorore twozongunḓe omurongo ongondoroka poo nḓa tjama  nOtutumbo nOvikunwa; Ouhepe wOviungura; Ozondjuwo; Ouveruke; Omahongero; Omatunduuziro wOvinangongo, Ombazu nOmanyando; Omapwisiro wOmananeno; Ombwiko; Omekurisiro wOviungurisiwa; nOmerikarekisiro wOkuti nOzondendera zako. 

Onamibia ri nomanenekero oro novandu varo ovo mbe ri ozomburo zaro zombutiro. Munao oyo otjiiṋa, ondando yomipepo nokuweza onḓengu kovize vyomehi. Munao ovatoorore otji va sere okuiitoorora tji mave paha ondanaukiro oyo tjinga ai ri ondanaukiro. 

Mai yanisa okuhenununa ouhepe woviungura nganduu pozoperesende omurongo (10) okukavaza ombura ndji o-2029, owo mOnamibia nai mbu ri pozoperesende ape 19.19 mo-2022. Nouhepe wozondjuwo nozoperesende o-30 kokutja kangamwa auhe ma yenene nokukara nokarukondi kehi poo komaturiro. 

Tjikweya kOtutumbo nOvikunwa OPDM mai yanisa kutja otjimariva tjaro mai yerurura nozoperesende omurongo zotjimariva tjohoromende otjiungurisiwa mombura. Ohunga no ma tungururiro wehi mai roto kutja ohepero ka ma karekero wo ma nyomoneno wehi, kutja ovayazeme varo vekare nonguzikiro. Otji ino ngamburiro yokutja ovature vo kozombanda vekare no undondi mo make wawo. Kutja veyenene oku yambeka ehi ndi va yazema oku yazema otjimariva ozondjo tjo ku tunduuza no ku randa oviungurisiwa vya kandinondi kutja ondunde yo mbuiko yawo ihare omasa na ndarire po tuvari.