Charles Ndeumane
OMALAPAPA – Omunangeshefa a tseyika nawa Ben Haupindi okwa yambidhidha aakalimo yomomukunda Olupito mOkalongo noosamende dhili 40 opo ya tunge uundjugo momudhingoloko gwawo.
Haupindi ngoka a tseyika nawa moongeshefa dhuumini ye okuliwo omunafaalama okwa ti omayambidhidho ngoka okwi iyamba ngaashi ta vulu oshoka anuwa oyena oshinakuganithwa shoku gandja koshigwana shoka hashi yambidhidha oongeshefa dhawo.
“Nuumaliwa Uushona mboka tuna, otatu kambadhala ngaashi tatu vulu oku kwathela oshigwana ngaashi oshoka otuna oshinakugwanithwa moshigwana,” Haupindi ta ti.
Haupindi okwa uvaneke oku yambidhidha niitungitho ayihe mbyoka ya pumbwa opo ku kwashilipalelkwe kutya uundjugo mboka owa mana oku tungwa. Kansela gwoshikandjohogololo shaKalongo Laurentius Iipinge okwa ti Haupindi oye gumwe gwomaamboka yena oshimpwiyu noshigwana. Ta ti uundjugo mboka itawu tungwa molwa omatompelo gopapolitika.
“Out shishi kutya ndika ethimbo lyomahogololo ashike shika inashi talikako onga omukalo gwoku konga aayambidhidhi momahogololo, ashike omayambidhidho ta ga kwathele omudhingoloko aguhe,” Iipinge ta ti.
Omunamukunda gumwe Eunice Haukongo okwa pandula unene komayambidhidho ngoka, ta ti kaya li yega tegelela. “Omayambidhidho ngaka kageshi ashike getu mbaka tuli mpaka ashike ota g aka longithwa nokomapipi tageya”.