OSHAKATI – Aalongwa posikola pEhenye moshitopolwa shaShana oya ningi aanelago sho ya yambidhidhwa nuukwathithi wokomathimbo mEtitatu lyoshiwike shika. Eyambidhidho ndika olya gandjwa kositola yoShoprite mOshakati.
Aaalongwa oya yambidhidhwa nomapakete guututa ge li 26.
Uututa womathimbo ohau dhana onkandangala monkalamwenyo yaakiintu, unene mboka kaaye na aakwathi oshowo iiyemo yoku wu landa.
Oyendji oya li ya thigi po oosikola omolwiiningwanima hayi holoka mosikola
uuna omukiintu inaa zala uukwathithi, omanga e li pethimbo ndyoka.
Omulongi goshilongwa shoLife Skills Nalitoke Sheepo ngoka a li a kambadhala okukonga omayindilo okuza komahangano ga yooloka okwa ti okwa ndhindhilike kutya hakehe omulongwa ha mono omayambidhidho ngoka okuza kaakuluntu.
Ta fatulula ta ti, okumona omasiku oku na omashongo ga yooloka.
“Okanona ke li methimbo ndyoka oka pumbwa ka kale ke na uukwathithi, opo ka vule okwiiwathela uuna ethimbo ndyoka lya thiki,” ta popi ngaaka.
Sheepo okwa popi kutya sho osho shoka a kambadhala okukonga omakwatho opo aalongwa ya yambidhidhwe yo ya kalekwe mosikola.
“Okumona omasiku, oshitopolwa shuukwatya wolutu lwaakiintu nuushitwe,” ta popi ngaaka.
Omulongi gumwe Saima Thomas okwa fatulula kutya onkayi yuututa mokati kaanona yosikola, ohai eta omaupyakadhi ogendji osho wo okulundulula oonkalamwenyo dhawo uuna inaaya silwa oshimpwiyu.
“Uututa womathimbo ohau dhana onkandangala mokati kaanona yaakadhona, unene tuu okuyanda okwaathiga po oosikola uuna sha holoka omanga ye li mootundi nenge mokati kaantu,” ta ti ngaka.
Ta kumagidha ta ti, egandjo lyuututa womathimbo nali kale onkalondjigilile nokusimanekwa moshilongo.
Omukalelipo gwaShoprite ngoka a gandja uututa womathimbo mboka okwa ti, Shoprite okwa yambidhidha ngaaka nelalakano lyokukwathela aalongwa ya vule ya kale moosikola oshoka oyo onakuyiwa yokomongula.
Esiku lyoWorld Menstrual Hygiene ohali dhimbulukwa omumvo kehe momasiku 28 gaMei okugandja omalongo nokuuvitha ko iigwana esimano lyomasiku oshowo omashongo haga adha aakiintu nenge aanona yosikola.