OSHAKATI- Omulumenhu weedula 36 vati okwa kwatwa onghonga komulumenhu mukwao ou e li kaume kaye.

Opolifi oya koleka tai ti omulumenhu ou okwa kwatelwa onghonga kobashu ya kaume kaye.Oshiningwanima osha ningwa oshivike sha dja ko molukanda Uupindi mOshakati efimbo loufiku.

Omukulunhu koshikondo shokunakona oimbuluma omupedu komufala Fredrik Ndjadila okwa hokolola ta ti nakuninga oshihakanwa okwa li tadi keendingosho nokwa li a kolwa.

Vati okwa ya monduda ya kaume kaye ou e li omufekelwa opo a ka nangale molwashi ka kwa li ta dulu okufika kobashu yaye.

Opolifi oya hokolola tai ti mongula eshi kwa sha nakuninga oshihakanwa okwa didilika kutya okwa longelwa omunyonena wopaixulo. Okudja opo okwa pula mukwao ngeenge meumbo okwa li mweya omunhu ndele te mu kwata onghonga. Opolifi oya ti omufekelwa okwa nyamukula ta ti oye mwene a ningila mukwao omunyonena wopaixulo.

Omufekelwa ina kwatwa po manga molwashi omakonakono opolifi otaa twikile moshikungu eshi. Opolifi oya kumaida oshiwana opo shi kale sha kotoka ngeenge tashi ka nangala komaumbo ookaume kavo unene ngeenge omunhu a kolwa.

Oshiningwanima shikwao, okakadona keedula 12 oka kwatwa onghonga pefimbo kwa li ta katyava oikuni. Oshiningwanima osha ningwa komukunda ekolanaambo moshitukulwa shaShana. Ota ku hokololwa kutya omufekelwa okwa ningila okaana omatilifo kutya ote ka dipaa.

Natango, okakadona keedula 18 nako oka kwatwa onghonga mOshakati mexuliloshivike. Opolifi oya hokolola tai ti omufekelwa okwa ya monduda yanakuninga oshihakanwa ndele te mu kwata onghonga.

Oshiningwanima shikwao, okakadona keedula 18 oka kwatwa kovalumenhu vatatu mOshakati. Ota ku hokololwa kutya okaana okwa li ta kadi kopale komaudano navakwao efimbo loufiku. Konima eshi va topoka navakwao, okwa dja ovalumenhu vatatu ndele tava kwata okaana onghonga.

Ka pena omufekelwa a kwatwa po nomakonakono opolifi otaa twikile.

– fhamalwa@nepc.com.na