Charles Ndeumane
ONGWEDIVA – Omumati omugundjuka omukalimo gwomOngwediva ngoka ena uunkulungu nohokwe yoku nduluka po iinima ya yooloka ta longitha iiyekelwahi ota kumike aanysha ya longithe iipewa nomagano gawo opo yiimonene iiyemo yo yiikaleke kokule niinima yaafele.
Omunamimvo 25 Shetu Nelongo oha shiti po iilongomwa oyindji unene iihongwathano yili momalupe ogendji ngaashi iinamwenyo, aantu nosho tuu. Nelongo ta ti ohokwe ye noshipewa shoku nduluka po iilongomwa ta longitha owala iinima ya yooloka mbyoka ha toola ohashi mu keelele komashongo ogendji gomomapandaanda sho ohashi etele iiyemo.
“Aantu oyendji ohaya si uunye monkalamwenyo ngele inayeshi enditha nawa momailongo gawo nenge yapita ashike kaye wete oompito dhiilonga. Ohaya dhimbwa thilu kombinga yiipewa yawo mbyoka ya pewa omagano kuKalunga. Ngame ndhidhilika kutya ohashi etele ndje ombili yokomwenyo ngele tandi longitha omagano gandje guunkulungu sho ishewe ohashi etelendje ngaa oshimaliwa ethimbo limwe,” Nelongo ta ti.
Nelongo okwa ti kasha shi oshipu oshoka olundji ompumbwe yoshimaliwa niilongitho oha yi kateke iilonga ye, ashike oku kala wiipyakidhila niilonga mbyoka wu hole otashi ku keelele komashongo oshowo omanwethemo omayinayi ngoka geli momapandaanda sho ishewe otashi kupe ompito yoku imonena oshimaliwa.
“Iipewa yetweni inayifaathana onkene kehe gumwe okuna ompito yokweetapo sha shayooloka tashi hokitha notashi vulu okumu etelapo sha. Ngele tandi ende tandi landitha iilongomwa yandje ohandi tsakaneke aantu oyendji ya kumwa kutya ohandi yi etapo ngiini oshoka haantu oyendji haya nighi iinima yoludhi nduka,” osho Nelongo a popi ngaaka.