Charles Ndeumane
Aakalimo yomoshikandjohogololo Oshikango oya popile etopolo lyoshitopolwa shaHangwena miintimbu iyali omolwomayakulo ngoka taya ti oge li kokule noshigwana.
Mbaka oya gandja omaiyuvo gawo moshigongi shoka ya li ya ningilwa kukansela gwawo komukunda Onamhinda.
Oshigongi shoka osha landula etalelopo lyokakomitiye kokutalulula oongamba moshilongo ndyoka kwa li inaali enda nawa koshitopolwa shaHangwena, oshoka anuwa aaleli oya li ya ningi omatokolo ngoka inaya kundathana noshigwana moshitopolwa moka.
Aashikango oyedji oya gandja omaiyuvo gawo moshikumungu shetendululo lyoongamba netopolo lyoshitopolwa shaHangwena, moka oyendji ya popile edhiladhilo ndyoka.
“Ohangwena oyo oshitopolwa shoka shi li konima kiitopolwa ayihe moshilongo ngele tashi ya kehumokomeho, otu li kokule nomayakulo, ngiika ngele oshitopolwa osha topolwa nomukunda gwetu otagu ka mona omayakulo ngoka ga pumbiwa unene ngaashi oombelewa nomayakulo guundjugo,” osho Rosalia Namundjembo, omukalimo a ti mokuyambidhidha edhiladhilo lyokutopola Ohangwena miitopolwa iyali.
Omukalimo omukwawo Rachel Katele okwa ti etopolo lyoshitopolwa shaHangwena oshinima oshiwanawa, ashike okwa dhenge omuthindo kutya shampa ashike edhina lyoshitopolwa itaali lunduluka, oshitsa shoka sha yambidhidhwa kaakuthimbinga ayehe moshigongi moka.
“Ohangwena oyi li puutiyali koKhomas miitopolwa mbyoka yi na aantu oyendji moshilongo, gwo natango omwaalu gwaantu otagu koko, sho omwaalu tagu koko ngawo oko ngaa koompumbwe dhomayakulo dhu uka pombanda,” osho Kansela gwoshikandjohogololo shaShikango Ester Ndatala Nghidimbwa ngoka a li a gongaleke oshigwana a popi ngaaka.