ONANDJOKWE – Ovanaudu moipangelo yepangelo, mwa kwatelwa ovakainhu kokanyofi naavo ve li mosaala yovanhu ve na oupyakadi wopamadilaadilo, ova lulilwa konghalo yokuhepekwa koombishi efiku keshe.
Okwa didilikwa onghalo yoombishi tava piyaneke oshiwana koipangelo tai dana onghandangala koshipangelo shaShakati, Eenhana, Engela, Onandjokwe noshoyo oshipangelo shaKatutura.
Omupangi umwe koshipangelo kEngela okwa hokolola nghee oumbishi hava nyange kosaala yokumonena ounona tava kongo omashe ovakainhu ovo va mona ounona.
“Oinima oyo (omashe) ohai tulwa meenailona ndee oto hange eenailona odo da pombolwa koombishi – tava li. Mosaala nee mwinya, mbishi ota dulu ashike okuenda ile ok nhuka kombada yokaana,” omupangi oo ina hala edina laye li tumbulwe ta hokolola.
Ovanailonga moipangelo vamwe ove na yoo elikwatopomutima molwaashi oombishi ohava i meesaala dovanhu ve na ounghundi wopamadilaadilo.
“Dilaadila ashike omunhu ta penduka a londwa kumbishi, ile a talwa kumbishi, ye oku na nale omadilaadilo ehe li ponhele…” Omupangi umwe moshipangelo shaShakati ta ti.
Pefimbo Kundana a talela po oshipangelo shaNandjokwe Etitatu, oomeme ve li momateelelo hava di kEwalanda otava nyenyeta tava ti ihava kofa vali molwaashi ohava nangala tava nukwa koumbishi nosho yo okunyawa.
Emilia Johannes a dile komukunda Evale moshitukulwa shaShikoto okwa hokolola ta ti ngeenge ve li mewalanda oikulya yavo unene tuu oshivelelwa ohai liwa po koombishi.
Okwa weda po ta ti eendjato davo dokukwatela ohadi pombolwa koombishi shaashi tava kongo oikulya.
“Kashipu okunangala mumwe noombishi tava kwena oufiku. Oombishi ohava kwena tava kondjele oikulya koshi yeembete detu,” ta ti.
Johannes okwa ti ove na omhito yokukwatwa komikifi da yooloka mwa kwatelwa wendabi shaashi okambishi otaka dulu okulumata omunhu.
Omunaudu umwe a ninga omafiku ahetatu moshipangelo shaNandjokwe okwa hokolola ta ti oombishi ohava nine kombada yeembete davo.
“Eshi to piti oto hange kombete yoye kwa nyatekwa kumbishi,” ta ti.
Okwa ti oukalata wavo woshipangelo ngeenge ve li poshitaafula ohava ningilwa eenyata koombishi.
Omukulupe weedula 86 a ya koshipangelo shaNandjokwe noku li a kalela omonamati a tambulilwa moshipangelo, okwa hokolola ta ti oha nangala pedu poshivelo shEwalanda ashike oha nangala a kondekwa koombishi tava kongo oikulya.
Ovakainhu ve li kokanyofi va ka pulumuna otava ti eehanana davo odi na omhito yokuponokelwa koombishi molwaashi oombishi ohava kala tava kondouwala va hala okulya po endjadja olo hali kala kekoto lokaana ngeenge opo ka dalwa.
Omukwashiwana umwe oo kwa li naye a tambulilwa moshipangelo shaShakati okwa hokolola ta ti kakwa li ha dulu okutula oikulya yaye poshitaafula molwaashi otai lika po koombishi.
“Ohatu patele oikulya yetu meesikopa molwaashi otai lika po koombishi. Oombishi vomoshipangelo shaShakati ihava toka oshikulya shi li mosaala,” ta ti.
Otaku hokololwa kutya oombishi vamwe ohava ka endaenda meesaala tava kongo omakipa oo a kupulwa meendoloma doimbodi.
Omudo wa dja ko koshipangelo shaShakati okwa li kwa lopotwa onghundana kombinga yoombishi vati hava i kosaala yokupulumunina tava ka nyaya ouhanana noshoyo okukonga omandjandja oo haa di kekoto lokaana ngeenge opo ka dalwa.
Omuwapaleki koshipangelo shaShakati umwe okwa hokolola ta ti ohava longo noudjuu okupawaleka keesaala da nyetekwa koombishi unene keembete dovanaudu.
Omukulunhuwiliki ta kwafele wouhaku moshitukulwa shaHangwena George Jeremiah okwa ti ombelewa yaye neudo oya lopotelwa kombinga yovanaudu tava nyenyeta molwonghalo yoombishi ve li keesaala.
Jeremiah okwa ti Etitatu ova ninga omutumba nelelo lovanambelewa vouhaku mOhangwena opo va kundafane kombinga yoombishi ve li keesaala.
“Otwa teleela enyamukulo okudja keembelewa da kula douhaku koWindhoek kutya oshike tashi ka ningwa po,” ta ti.
Omupopiliko wouministeli wouhaku nomayakulo opashiwana Walters Kamaya okwa ti ouministeli wavo owe lipyakidila nokukala wa kandula po omukundu woombishi ve li koipangelo.
Kamaya okwa kumaida oshiwana opo shi kaleke po eesaala da yela efimbo keshe.