Ngoloneya woshitukulwa shaHangwena Sebastian Ndeitunga okwa kumaida oshiwana opo shi xulife po okuteya po eemboola domeva.
Edi Ndeitunga okwe di popya pefimbo a talela po oshikandjohoololo shaKongo Etivali.
Ngoloneya pamwe nakansela waKongo Efraim Shipindo, noshoyo oovene vomikunda ova ninga oshikongo shokutalelapo omikunda da yooloka odo dina eemboola domeva.
Elalakano okuyandja ehongo nouyelele kombinga yefimano leemboola domeva noshoyo okukelela oshiwana shiha teya po eemboola.
Okwa didilika oshikandjohoololo shaKongo osho shimwe shi na omwaalu muhapu weemboola domeva datewa po kovakwashiwana.
Ndeitunga okwa ti itashi ulike efano liwa ngeenge oshiwana tashi longele ominyonena omaliko epangelo.
“Oshi li oshinakuwanifa shomunhu keshe a kaleke po ombola yomeva i li meameno. Oovene vomikunda longeni kumwe noshiwana sheni okukalekapo eameno leemboola,” Ndeitunga ta ti.
Ngoloneya okwa ti eemboola oda nunimwa okuyandja omeva koshiwana noimuna.
Neudo minista wounamapya, omeva netulululo lomadu Calle Schlettwein okwa ti ovanhu tava teya po eemboola nava lopotwe opo va pewe ehandukilo lopaveta.
Minista okwa li a popya ta ti epangelo ota li longo noudinini okuyandjaneka omeva koshiwana ashike ovanhu otava teya po eemboola – fhamalwa@nepc.com.na