Paulina Ndalikokule
Aagundjuka yaali mboka taku fekelwa ya kengelele aantu 60 nasha melanditho lyoopolota dhiikengelela inaya pewa oombooloha.
Mbaka oyo omunamimvo 24 Joseph Shikesho ngoka anuwa oye omutotipo gwehangano ndyoka lyedhina Tuyoleni Housing Project omanga Alpo Billy Namukwambi (23), omukuluntuwiliki gwehangano.
Ayehe oya holoka mompangulilo yamangestalata mOmaandaha – Shikesho okwa holoka mompangulilo kOshakati, omaga Namukwambi a holoka mompangulilo koWindhoek, noya tindilwa ya ifutile mo mondholongo. Oya li wo ya kwatwa nomunasikola ngoka ya adhika ya kuta, ashike ye okwa ethiwa.
Shikesho okwa taalela iipotha ine yuulunga mokulongitha okatoo. Shikesho oku li momake gopolisi yaShakati, oshipotha she osha undulilwa komasiku 29 Januali 2025 manga omakonakono gopolisi taga tsikile.
Namukwambi naye okwa taalela oshipotha shuulunga mokulongitha okatoo, oshipotha she osha undulilwa komasiku 21 Aguste 2024, nomakonakono gopolisi otaga tsikile moshiningwanima shoka.
Otaku hokololwa kutya Shikesho yo naNamukwambi oya pondola okutula mokatoo aantu ye li 20 moWalvis Bay, 20 moWindoek, 13 Tsumeb naatu 10 mOngwediva sho ye ya landitha omahala gevi giifundja. Anuwa mbaka oya pula ya futwe oshimaliwa sho N$50 000 kukehe omulandi ashike oonakuningwa iihakanwa kape na nando ogumwe a pewa oopolota ndhoka.
Omunambelewa omukuluntu koshikondo shokukonaakona iimbuluma mopolisi mOshana omupevikomufala Fredrick Ndjadila okwa lombwele Kundana kutya oongangala otadhi longitha omikalo kehe okuyuga aantu iimaliwa yawo onkene osha simana opo aakwashigwana ya kale nokukwashilipaleka uushili womahangano opo kaya yugwe iimaliwa yawo.
“Mboka taya ningi omiyonena naya tseye kutya opolisi unene tuu mOshana itayi ka sholola oku ya konga sigo tatu ya kwata po,” Ndjadila a ti ngaaka.
Opolisi otayi indile oonakuningwa oshihakanwa ya patululile ehangango ndyoka iipotha popolisi kehe yi li popepi.