Charles Ndeumane
Ehangano lyoNamibia Housing Enterprise (NHE) olya gandja omagumbo kaakalimo yomondoolopa yaSwakopmund ye li 119 mOmaandaha.
Minista gwehumokomeho lyoondoolopa nomikunda Eratus Uutoni mOmaandaha okwa gandja omagumbo ge li 119 ngoka ga tungwa kohi yopolohalama yokutunga omagumbo gomwaalu ogundji, (Mass Housing Development Plan).
Moshipopiwa she pethimbo a gandja omagumbo, Uutoni okwa ti omagumbo ge li 505 okwa li ga thikama ethimbo ele inaaga pwa okutungwa molwoontamanana dhopaveta ndhoka dha li pokati komahangano ngoka kwa li taga tungu omagumbo ngoka, ashike paife opolohalama yomagumbo oya tameka ishewe, nuuministeli ohawu gandja omagumbo ngoka gwa pwa okutungwa miipandi, ngaashi ngoka ga gandjwa ge li 119.
“Omagumbo ngaka ge li 119 twa gandja nena mpaka ogamwe gomomagumbo ge li 319 ngoka ga gandjwa kehangano lyokutunga lyoNew Era Construction, opo ga mane okutungwa,” osho Uutoni a ti.
Omupopiliko gwa-NHE Tuafi Shafombambi okwa lombwele Kundana kutya omagumbo oga pewa aantu mboka ya li momusholondondo gokupewa omagumbo uuna ga mana okutungwa. “Aantu ohaya ishangitha momusholondondo nuuna pe na omagumbo taga gandjwa ohatu tala kwaamboka ya gwanitha po iipumbiwa yokupewa omagumbo,” osho Shafombambi a popi ngaaka.
Uutoni okwa ti uumisteli owu shi kutya owa pumbwa okulonga nuudhiginini opo wu gwanithe po ompumbwe yomalukalwa ge li pondondo yi li nawa koondando tadhi vulika kAanamibia.