Omulumenhu weedula 46 okwa xulifa eshi vati a dipawa kondjaba pefimbo kwa li ta kendabala oku i yasha nondjebo.
Oshiningwanima osha ningwa Omaandaxa koshikandjohoololo Tsandi moshitukulwa shaMusati efimbo lomutenya.
Nakufya okwa tongololwa oye Andries van der Wart a dile koSwakopmund.
Omupopiliko wopolifi moshitukulwa shaMusati Inspekta Anna Kunga okwa hokolola ta ti Van der Wart okwa ifanwa kouministeli womidingonoko opo a ka dipaye ondjaba oyo ya li ya nyika oshiponga.
Ondjaba ei vati okwa li tai piyaaneke ovanhu pomudingonoko opo.
Ashike monghendabala yoku i yasha, mboli okwa palufa. Ondjaba oya bulukutila Van der Wart noku mu dipaya pefimbo opo tuu opo.
Opolifi oya kumaida oshiwana opo shi twikile okulopotela ovanambelewa tava longele kouministeli womidingonoko ile opolifi ngeenge sha mono eendjaba momidingonoko davo.
Omupopiliko wouministeli womidingonoko, ovapashioni nomakuti, Romeo Muyunda okwa ti ouministeli owe lipyakidila nokukonakona oshikumungu kombinga yefyo lomulumenhu ou.