Charles Ndeumane
ONGWEDIVA – “Ngele otwa kala twa mwena, mboka taya longo iimbuluma mbyoka otaya mono omukumo gwokutsikila niilonga yawo iiwinayi.”
Omuhwahwameki guuthemba womuntu Rosa Namises okwa gandja omaiyuvo ngaka pethimbo a yi moonkundathana naKundana, molwiimbuluma yomakwatokoonkondo, ta ti oya pumwa okuungaungwa nayo meendelelo.
Manga oshilongo tashi kondjitha omahepeko gopaukashikekookantu, iimbuluma oyindji yomakwato koonkondo yi nyanyalitha onkene tayi lopotwa – oyindji yomuyo oya ningilwa aakiintu naanona aashona. A kwatwa koonkondo e ta dhipagwa
Oshiningwanima tashi zitha omahwilili osha ningwa momukunda Omundaungilo moshitopolwa shaHangwena moka omukiintu gwomimvo 40 a dhipagwa konima sho a kwatwa koonkondo.
Okwa lopotwa kutya nakuninga oshihakanwa okwa li mondjila u uka kegumbo ta zi puundingosho wopopepi sho omufekelwa e mu hilile miihwa ndele te mu kwata koonkondo, nokonima okwe mu pondo sigo a hulitha.
Shi ikolelela kolopota yopolisi, otaku fekelwa kutya nakuninga oshihakanwa okwa li ta zi kuundingosho oye awike ongulohi yOlyomakaya 12 Juni 2024, ashike okwa li a idheng mo. Nakuninga oshihakanwa okwa dhimbululwa kutya oye Kristofina Lucia Hamulenge, aapopepi naye oya tseyithilwa. Omufekelwa omulumentu omugundjuka Omunamibia, okwa kwatwa po nokwa holoka nale mompangu mOmaandaha goshiwike shika.
Uunona wuumati nawo owu li moshiponga
Moshiningwanima sha yooloka shekwatokoonkondo, ondohotola yopaunamamiti oya mangwa po pamwe naina sho anuwa a kwata okamwanamati koomvula hetatu koonkondo.
O’Brian Anthony Davids, ndohotola ha longele moshipangelo shaKatutura Windhoek ye ishewe oha kwathele oshikondo shuukashikekookantu ngele tashi ya kiipotha yomakwatokoonkondo, okwa kwatwa po kopolisi mEtitatu lyoshiwike sha zi ko sho anuwa a kwata okamwanamati koomvula hetatu koonkondo okuza momumvo 2018 sigo omuFebuluali nuumvo.
Yina yomufekelwa omunamimvo 58, yinakulu yokanona hoka ka kwatwa koonkondo, naye okwa mangwa po moshipotha shoka molwaashoka anuwa okwa kwathela omufekelwa moshimbuluma shoka.
Shi ikolelela kolopota yopolisi, oshiningwanima shoka osha ningilwa megumbo lyi li moKlein Windhoek okuza 2018 sigo omuFebuluali nuumvo.
Omupopiliko gwopolisi komufala Kauna Shikwambi okwa ti aafekelwa oya holoka nale mompangu yamangestalata moWindhoek noye li mondholongo.
Moshiningwanima sha yooloka, omumati gwomimvo 19 omukwashigwana gwaAngola okwa kwatwa po kopolisi momukunda Oshikukutu konima sho anuwa a kwata okakadhona komimvo 13 koonkondo.
Shi ikolelela kolopota yopolisi, omumati oha longo megumbo lyi li puushiinda naamoka hamu zi nakuninga oshihakanwa momukunda Oshikukutu moshitopolwa shaShikoto.
Omufekelwa okwa holokele mompangu yamangestalata gwaNdangwa mOmaandaha gomasiku 17 Juni 2024.
Sho iimbuluma yi nyanyalitha yomakwato koonkondo tayi tsikile okuya puuyelele, shika ekwashilipaleko kutya ekondjitho lyomahepeko gopaushikekookantu moshilongo inali pwa natango. Iiningwanima mbika tayi tilitha otayi ulike kutya osha pumbiwa okukatuka onkatu meendelelo opo aanona naakulukadhi ya gamenwe.
Omukokele ‘a kwata okanona koonkondo’
Moshiningwanima oshikwawo shekwato koonkondo, omunamimvo 67 Leonard Pendapala Namuhuja ngoka a li ha longele omuperesidente omukulu gwaNamibia Hage Geingob pethimbo a li omupilimaminista, okwa tindilwa ombooloha lwoshikando oshitiyali konima yiiwike iyali ya piti mompangu yamangestalata gwaNdangwa moshipotha shoka ta tamanekelwa ekwato koonkoondo lyokanona komimvo 13 hoka ka li metonatelo lye nomukadhi.
Otaku fekelwa kutya Namuhuja ngoka a li ta tekula okanona hoka, okwa kwata okanona koonkondo muApilili megumbo lye mOniipa, manga omukulukadhi gwe a li a ka landa omboloto koositola.
Osha dhimbululwa kuyina yokanona konima yiiwike iyali okuza sho okanona ka ka dimbululwa kutya otaka ende nuudhigu. Okwa li a tokola e ka fale koshipangelo opo ka ningilwe omakonakono. “Omakonakono gandohotola oga ulike kutya okanona oka kwatwa koonkondo, ashike kaka li taka popi kutya olye e shi ninga, ashike konima yomasiku “oka eta puuyelele kutya oka ningilwa omatilitho kaaka makuke sha.
‘Ina silwa ohenda’
Oshiwike shika Omweeti gwiihokolola yepangelo Emma Mayavero okwa pula ompangu opo yi pe Werner Kaili (45) egeelo lya shiga ko sho a monika ondjo mekwatonkonga lyokanona komimvo 13 hoka anuwa a li ta tekula. Mayavero okwa pula omupanguli Celma Amadhila a gandje egeelo ndyoka ongetumalaka kwaayehe mboka ye li po taya dhiladhila okukwata aanona aashona koonkondo.
Otaku hokololwa Kaili a kwata okanona hoka koonkondo lwiikando ine mo2019 nomo 2020. Melissa Widisch ngoka a kalele po Kaili okwa pula ompangu opo yi sile ohenda omuyakulwa gwe, ta ti opo ta kayula onyanga lwotango nonando e na omimvo 45, ye ishewe okwa ulikila ompangu kutya okwi ipa ombedhi.
–mrndeumaneraycharles@gmail.com