Charles Ndeumane
IINDANGUNGU – Omukalimo gwomomukunda Ombili moshikandjohohololo shaKaku okwa ti ye nofamily ye oya thigwa kaaye na olukalwa sho anuwa egumbo lyawo nepya ya hanagulwa po kolutenda ndoka lwa taakana mepya lyawo.
Vistorina Asino okwa ti ehangano lyoTransnamib olya longitha omukwanezimo gwawo ngoka ali ena uunkundi wopamadhiladhilo ngoka aadhika megumbo opo ya ndhidhilike euvathanotsokumwe lyoku pititha volutenda mepya lyawo koshimaliwa shoondola omayovi N$40.
Asino ota ti molwa omundundumo gweshina lyokolutenda ngashingeyi omakuma agehe megumbo oga tenda omisa ominene kaage na esiku inaaga teka po onkene ita ya vulu okulala megumbo moka oshoka oya tila okugwililwapo komakuma. Ngashingeyi aanegumboye ayehe oya tembukila koshipeleki shili kokule negumbo.
Onda ninga oonkambadhala ndi kwatathane naTransnamib etu futepo tuzepo mpaka opo tuka konge epya limwe mpoka tatuka dhika egumbo lilwe oshoka itatu vuluwe oku kala megumbo ndika lya tenda nayi ngeyika, kalina esiku inaali gwapo. Ashike yaanambelewa yaTransnamib oshowo yuuministeli wiilonga niiyenditho ohayetu lombwele owala mutya natu tegelele manga anuwa oya tegelela eyamukulo okuza kuminista okuza momumvo 2009,” Asino ta ti.
Asino okwa ti oshinima shoka oshemu hepeka unene pamadhiladhilo oshoka ngashingeyi ofamily ye kayina epya lyoku longa iipalutha. Anuwa nonande okuna oonkondo dhoku longa, omeya gomvula ngoka haga tongoka tagazi kolutenda ohaga kungululapo iilya niikunomwa ayihe mepya.
“Shika kashishiwe epya, ngele omvula ya loko omeya ohaga matuka owala okuza kolutenda ndele etaga dhilaga iilya yetu. Ngame onda penzelwa nale kandina we iiyemo, aamwandje inaya mona iilonga onkene katuna omuyambidhidhi. Otwa hala ashike uuministeli wiilonga niiyenditho wutu fute tuka konge epya limwe,” Asino ta ti.
Omunambelewa gwiipambele yoshigwana muuministeli wiilonga niiyenditho Maria Hedimbi ina yamukula ongodhi ye sho oshifokundaneki shika shali sha ningi oonkambadhala dhokuya moonkundathana naye opo uuministeli wu gandje uuyele moshinima shika.
Omunambelewa mombelewa yoshikandjohogololo shaKaku Fillemon Jatileni okwa ti ombelewa yawo oyali ya ka ninga omapekapeko kegumbo nepya lyaAsino momumvo 2019 noya mono kutya Asino okwa dhilula egumbo nepya lye akagame kombinga onkwawo yolutenda nani oko haku matukile omeya ogendji pethimbo lyomvula.“Momumvo 2019 oko twali kegumbo lyameme Vistorina, otwa mona nkene epya negumbo lyayonwa kolutenda, ashike yemwene okwa tembuka okuza kombinga yolutenda hoka kwali kuli hwepo akagama hu haku talama omeya nayi. Anuwa oyali ya futwa opo olutenda lu ende mepya lyawo. Otwa kambadhala ngaa oku kwathela ashike oonkambadhala dhetu odha hulile muunyengwi,” osho Jatileni a ti.