Zebaldt Ngaruka

EPUKIROS – Ai!âkam Namibiab ǁKhaubasens ǀHûs (NDF) ǁanib, Matthews Kandengeb ge ǀgūǁae xūn hîa N$10 000 ǁkhāsiba !khōǂgā hâna Ohakavena ǀGôaro!hanaba ge ǀkhae. Nēb ge ǀgaub hîab ǁgau!nâs Namibiab ǀGôa-i dib kōse ra huiba. 

Nē ǀkhaeb ge ǁgâiǁnâ-ū masins tsî 15 gowngu ǀgôaron nēpas ga ǁkhāǁkhāsensa a toa, o ǁîba ǂgaeǂgā tsî nē !harib ǁkhāǁkhāsens diba ra ǀamǀamūse.  

“Tita ge ǁgau!nâs di ǂhâǂhâsiba ge ǂâi!gâ tsî taren ǁnāpa a !khōǂgāsas tsîna. 

ǁKhāti ta ge ge mûǂan ǁgau!nâs mâtikō mâxōǀkhāsa !augaba xus tsîna ǂhâ hâsa,” tib ge ge mî. ǁGâiǁnâmasins ge īǁkhāsiba nî hā-ū, ǀgôaron supuse ǁkhā-khāsens ǀkha ra !gûǁare xūna nî !khō!oasa. Skoldanas nē ǀgôaro!hanab dis, Aline Tjeripo Hovekas ge nē ǀkhaeba ge !khō!oa tsî gere mî, nē ǀkhaeb ge !âubasen taman hâse a hāsa. Nēb ge amase !gâi ǀgauba, sida kaira khoe-e xu tsî khoexa!nâsiba ra ǁgau. 

Kaise da ge ǂgaoba xu ra gangan nē ǀkhaeb kai !gâi!gâb ase sida ǀgôaro!hanab !aroma īsa,” tis ge ge mî. Skoldanas ge ai!â ge mî, nēs ǂguro !nā tama hâsa Kandengeb nē ǀgôaro!hanaba ra ǂkhâ!nâs diba, ǂnuwis sîsengu a ǀhawe-ūhe ǁaeb !nâb ge ǁkhāti pirisa ge mā hîa omaoga sâi tsî gere ǂûmāhesa. “ǁKhātib ge mario!nâse ǁgam-i tenksa Omaueuozondjandasa xu ge hā-ūba da. 

Sida kairab ge ǁnā marisa ge mātare,” tis ge ra ǂâi-oa. ǁÎs ge nē xūn nî !gâise !ûi!gâhes ǁawosasiba ge mā tsî nau ǀhûhâsib ǁanina gere ǂgan, ǁkhān apa nē ǀgôaro!hanaba mâxōǀkhāsa. 

New Erab ge ǀnî ǁanǂgāsaben tsî ǁgûn hîa nē ǀkhaeb !aroma ǂgaoba xu gere dân ǀkha gere ǁgamǁare, tsî Aline Kandovazus, ǀgam ǀgôana nē ǀgôaro!hanab !nâ ǂgāhâs ge ǁîs di ganganǂgaoxasiba nē ǀkhaeb !aroma gere mā. 

“ǀHûhâsib ǁanin tsîn ge nē ǀkhaeba xu nî domdore, !gōsase ǁgâiǁnâ masinsa xu. Sida ge ǁîna xu marirosa nî ǂgan, ǁgâiǁnâna dībahes !aroma,” tis ge ge mî. 

Mueze Ndjaveras, -ǁîs tsîn a ǁgûs ge gere mî, nē masins nî maris hîa ǁgâiǁnâga dīs !aroma Omaueuozondjandas !nâ ra mātaresa nēsi sâusa.