ONGWEDIVA – Omalelo opamifyuululwakalo a yooloka monooli okwa pula ovakainhu ovo ina va hala vali ounona vavo ile tava hepekwa koupyakadi wopamadilaadilo opo va twale ounona komaumbo opamifyuululwakalo va ka tekulwe.

Oveleli va yooloka wopamifyuululwakalo ova popya e li kwateelela koshikumungu shomukainhu weedula 24 a kula ounona vaye veehamba mondobe yomeva ndele tava faduka po.

Natango konima yeemwedi mbali okwa lopotwa omukainhu weedula 34 a kupula shi okaana kaye mokandjuwo kOmungwelume.

Okwa didilikwa ounona van inga oihakanwa yokulongelwa ominyonena dokukupulwa shi kooina osho shi li tashi limbilike ovaleli vopamifyuululwakalo.

Omukwaniilwa woshitunda shaNdonga Shuumbwa Nangolo okwa ti elelo lavo ole li longekida okukala la yambidida ovakainhu ovo ina hala vali ounona vavo.

“Ounona na va etwe keumbo lelelo letu kOnambango. Otuna oilya oyo hai etwa koshiwana kouwa ya pumbwa okuliwa po,” ta ti. Okwa yelifa ta ti nande kouwa kakuna oikulya ya wana elelo oli na okutala kutya ota li ningi po shike okuyambidida ounona ovo ina va ha lika kooina. Shuumbwa okwa kumaida ovakainhu opo alushe va kale tava kwatafana neembelewa doikandjo yavo una ngeenge ina va hala vali ounona vavo.

“Osha puka ngeenge omukainhu ta ku pula shi okaana kaye. Ounona kave na ondjo,” ta ti. Elenga elele loshitunda shUukwambi, Ndilimani Iipumbu okwa ti omalelo opamifyuululwakalo naawo ota dana onghandangala ya kula okuyambidida ovakainhu ovo ina va hala vali ounona vavo. “Ohatu lalakanene okukelela onghalo younona opo vaha ninge oihakanwa yokuningilwa ominyonena kooina. Otuna oshisho younona vetu moshilongo,” ta ti.

Iipumbu okwa ti omalelo ita popile oomeme tava kupulashi ounona vavo molwaashi vehe li udite naxe yokaana.

“Okaana ka kena epuko ngeenge omukainhu ke na ombili naxe yako. Ovakainhu nava xulife po okulongela ounona vavo ominyonena shaashi tava dengwa koluhepo,” ta ti.

Ohamba mekulu Martha Mwadinomho yaKristian Nelumbo okwa ti kOuhambo kOmhedi okuna ounona ve dulife 20 tava tekulwa molwaashi ina va halika kovadali vavo.

“Ohandi twikile okutambula ko ounona ovo ina va halika vali kooina,” ta ti. Mekulu Ohamba okwa ti okwa kumwifwa koshikumungu yomukainhu a kupula ounona vaye mondobe yomeva.

“Eteni eedjona dakalunga oku fye tu di tonatele,” ta ti.

Omufita Laban Mwashekele okwa popya ta ti ovafita navo otava dana onghandangala yokuyandja omayakulo exungomwenyo kovakainhu ovo tava hepekwa koupyakadi wopamadilaadilo.

“Otwa didilika ovakainhu vamwe hava kala va tumba oshinyenyu ngeenge vehe na ombili naxe yokaana,” ta ti.

Okwa yelifa ta ti ombelewa yaye oya manguluka okuyambadida omukuinhu keshe teke li hanga ta hepekwa komadilaadilo shaashi a fiwa po kuxe yokaana kaye.

Mwashekele okwa pula oomeme opo natango va ka konge omakwafo kovangimwenyo koipangelo shaashi okupulashi okaana ka kushi ekandule po lomukundu.

fhamalwa@nepc.com.na