OUTAPI – Omupedupresidente woSwapo Netumbo Nandi-Ndaitwah okwa ti okwe lilongekida okulela oshilongo nokukala a ninga Omupresidente womukainhu wotete moNamibia.
“Ame inandi tila eengudu domilamhenho. Ondi na omukumo kutya ohandi ka findana momahoololo oneudo,” ta ti. Edi Nandi-Ndaitwah okwe di popya koshikonga shoSwapo osho sha li kOutapi moshitukulwa shaMusati Osoondaxa.
Eengudu dopapolitika onde lipyakidila nokuninga oikonga yomahoololo pefimbo eli nelalakano lokuxwaxwameka oshiwana di hoololwe.
Neudo otaku kala omahoololo momafiku 27 Novomba, omo oshiwana tashi ka hoolola omupresidente mupe nosho yo oilyo yomutumba wopashiwana.
Nandi-Ndaitwah oku li oye omuulikwahoololwa woSwapo noku li a tambulwa ko kokakomisi ha ka ungaunga noipambele yomahoololo moshilongo.
Okwa kumaida oshiwana opo shiha pukifwe keengudu domhilameno molwaashi Swapo oye ashike ongudu tai dulu okulela oshilongo.
Nandi-Ndaitwah okwa ti aishe ta popi pefimbo loshikonga otai ka ningwa ngeenge okwa ningi omupresidente shaashi iha popi oipupulu. “Swapo ongudu i na olukeno noshiwana. Indeni momwaalu muhapu mu ka hoolole Swapo,” ta lombwela ovanhu pefimbo loshikonga.
Okwa ti ngeenge okwa ningi omupresidente ota wedela oshimaliwa osho hashi i kehangano lokufutila ovalihongi ve li koiputudilo yopombada lo-NSFAF.
“Ovanyasha otava ka pewa eemhito doilonga nosho yo oshimaliwa shokuninga eengeshefa davo. Ovanafaalama otava ka yambididwa nghene ve na okuyambula po oshikondo shounamapya moshilongo,” ta ti.
Okwa weda ta ti ota ka andjaneka oupangelo kominda neefikola nosho yo omeva.
Okwa ti konima yemanguluko Swapo okwa etela ovanhu omayakulo popepi ngaashi eefikola nosho yo okutunga eepate.
Okwa weda po ta ti ovanhu koitukulwa yokonooli paife ohava nu omeva a yela.
“Komikunda okwa tungwa eemboola domeva. Eefikola oda tulwa olusheno omanga ovanafikola ve li koiputudilo yopombada ohava futilwa ofikola kepangelo olo li li koshi yaSwapo,” ta ti. Okwa weda po ta ti eengudu domilamheno itadi dulu okulonga osho sha longwa koSwapo.
“Swapo oku na ondjokonona yakula moshilongo molwaashi oya etela Namibia emanguluko. Kakwa li shipu okumona emanguluko ashike ovakwaita voSwapo ova kufa ombinga moita okukondjela emanguluko,” ta ti.
Hamushangandjai wongudu yoSwapo Sophia Shaningwa okwa lombwela oshiwana kutya Nandi-Ndaitwah oye ashike omunhu ta dulu okulela oshilongo.
Okwa ti otashi ka kala onghundana iwa kovakainhu ngeenge Nandi-Ndaitwah okwa ningi omupresidente.
“Inamu ninga nande epuko lakula lokukala inamu hoolola Nandi-Ndaitwah,” ta ti.
Shaningwa okwa yelifa ta ti Nandi-Ndaitwah ina kulupa ashike oku na ondjungu nounongo wokulela oshilongo.