Cecilia Iyambo
Nonkondwarongero edi dakara asi kwazura dakara moKavango zoupumezuva, ruha rwerongo ngesi hansa vanavatere mokudika ko nonkondwarongero do primere momudingonoko gwaNdiyona, evango eli lyakara asi nokilo meta 100km kutunda moRundu. Nosure edi doprimere kuna kara asi dimwe edi vana kudika momukunda ogu Kavango zoupumezuva meyereko lyosimaliwa mvhura ezi.
Siruwo sepongo lyovamitili pevango lyoolyo lyepe, mukurona gerongo momukunda Christine Shilima kayinkondopekere asi ministeli kwaruganesa yimaliwa yokusika konyara N$50 nomiliyuna mokudika nonkondwarongero vagusepo udigu ou wokusesipu nosure momukunda.
Age katente asi nosure ntano kwadidika moRundu, meyereko lyosimaliwa lyomo 2023/24 eyi yapuranye yimaliwa yokusika ko N$29 nomiliyuna. eyi kwayirugene nositambo asi vagusepo nye udigu ou wonosure dina sesupa, eyi yaninkisire vanona vavarongere monotende morwa mavangpo kwato gonosure dekuma.
‘’Ose kapi tuna hara mukaro gokuninkasi mitili kuna kuronga vanona wokusika ko 50 monkondwarongero zimwe tupu.
Ose kuna kuvarura nye vanona mwankenye mudingonoko, makura tatutara asi varongwa vangapi tuna kara nawo. Ose ngesi kunakugazara asi varongwa vetu vahepa kukara 40 mwankenya nkondwarongero,’’ yimo ana kutanta. Kavango zoupumezuva kuna kara nye ngesi novanona wokupitakana 79 000 ano mowo 11% kuna kara asi womoNdiyona.
Shilima katente asi projeka ezi nye zompe vakudika nosure navazimana kukwama nondambo. Nosure dimwe navadidika nye ngesi mosiruwo sokuhova. Foromani gomukunda ogu Paulius Lipayi katambwireko mawoko gavali elikwamo eli lyekuliko. Age katente asi mukaro ogu gonosure dokuzura kuna kara udigu wounene sili omu varongwa ndi vamitili yina kuvadogopera mokugava erongo lyokusikiliramo.
Foromani simpe kazire komeho nokuhuyunga asi ekuliko lyangesi naliretapo yirugana kovatungimo vendi. Varongwa kapi navakara hena asi kuna kugenda sinano sosire vakasike kosure. Monomvhura dapita, mukunda kwakara noudigu morwa kwato nonkondwa rongero ntani mokutura nye varongwa mononkonndwarongero., kuzura unene ntani kapi vakara nomavango ndi nosure vadika nekuma dononzi.
Cecilia Iyambo murugani komberewa zomapukururo koministeli zomapukururo nomagwanekero paunkurungu.