OSHAKATI – Uuministeli womidhingoloko, iihwa nomatalelepo, elelo lyondoolopa yaShakati osho wo oombelewa oonene dhoshitopolwa shaShana otadhi longekidha okudhimbulukwa esiku lyomiti oshowo okwoopaleka ondoolopa yaShakati.
Esiku lyomiti nokwoopaleka ondoolopa yaShakati otali ka kala ko oshiwike tashi ya momasiku 12 gaKotomba nuumvo kOnawa.
Omugandji gwomauyelele muuministeli womidhingoloko Romeo Muyunda okwa indile oshigwana ashihe shi kuthe ombinga mokwoopaleka iitopolwa yawo.
Muyunda okwa li a kunkilile nomuthindo kutya uuyogoki owo nawu kale tango.
“Natu kaleni moondoolopa dha yela, naatalelipo nayo otaya kumagidhwa ya kaleke omahala taya talele po ngaashi ye ga adha,” ta kumagidha ngaaka.
Ta gwedha po ta ti, ehala ndyoka lya yela ohali hili wo aantu oyendji.
“Uuyogoki owa simana onkene oshigwana oshi na okukala tashi opaleke omalukalwa gasho osho wo omidhingoloko dhasho opo ku yandwe omikithi tadhi vulu okupitila moongaga,” ta popi ngaaka. Ta gwedha po kutya omiti ohadhi opalekitha oondoolopa, ohadhi gandja ombepo nohadhi koleke uundjolowele womuntu,” ta ti ngaaka.
Muyunda okwa kumagidha wo oshigwana ta ti nashi kale kale oshinakugwanithwa shakehe gumwe okutsika omiti.
Mayola gwondoolopa yaShakati Leonard Hango okwa kumagidha oshigwana shi kuthe mbinga esiku ndyoka okwoopaleka ondoolopa.
Hango okwa kala nokukumagidha oshigwana shaShakati kutya nashi kale sha tula uuyogoki komeho.
“Ondi inekela kutya kehe gumwe okwa hala ondooloopa ndjika yi hume komeho, pamukalo gwomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka.
Hango okwa ti, esiku ndyoka inali kala olyo tali opalekitha aakwashigwana, ihe nashi kale onkalondjigilile noshiholelwa shokwoopaleka.
Omugandji gwomauyelele melelo lyondoolopa yaShakati Katarina Kamari okwa ti ngaashi naana sha kala nokutumbulwa kutya ondoolopa yaShakati nayi zize, otandi kumagidha aakwashigwana ya itule mo mokutsika omiti,” ta kumagidha ngaaka.
-vkaapanda@nepc.com.na