OSHAKATI – Ovanhu ve na oulema womesho ova tumbalekwa koSwapo konima eshi embo lomanifesto yoneudo loSwapo la tolokwa notali dulu paife okuleshwa kovapofi. Pefimbo loshikonga shoSwapo osho sha li kokapale komaudano kOshakati Olomakaya, omuulikwahoololwa Netumbo Nandi-Ndaitwah okwa ti Swapo okwa fimaneka ovanhu aveshe pehe na omunhu ta ningilwa okatongo.
Okwa ti osha fimana opo Omunamibia keshe a kale e na eudeko kombinga yomanifesto yoSwapo. “Manifesto otai yandje ouyelele we lixwa po kombinga yoilonga tai ka longwa koSwapo mwa kwatelwa omayakulo a yooloka,” ta ti. Ovanhu ve na oulema womesho okwa li va hafa okupewa omambo omanifesto oo a tolokwa.
Nandi-Ndaitwah okwa lombwela oshiwana ta ti okwe lilongekida okulela oshilongo nokukala a ninga omupresidente womukainhu wotete moNamibia.
“Ame inandi tila eengudu domilamenho. Ondi na omukumo kutya ohandi ka findana omahoololo oneudo,” ta ti.
Okwa kumaida oshiwana opo shiha pukifwe keengudu domhilameno molwaashi Swapo oye ashike ongudu tai dulu okulela oshilongo.
Nandi-Ndaitwah okwa ti aishe ta popi pefimbo loshikonga otai ka ningwa ngeenge okwa ningi omupresidente shaashi iha popi oipupulu. “Swapo ongudu i na olukeno noshiwana. Indeni momwaalu muhapu mu ka hoolole Swapo,” ta lombwele ovanhu pefimbo loshikonga.
Hamushangandjai wongudu yoSwapo Sophia Shaningwa okwa lombwela oshiwana ta ti Nandi-Ndaitwah oye ashike omunhu ta dulu okulela oshilongo.
Okwa ti otashi ka kala onghundana iwa kovakainhu ngeenge Nandi-Ndaitwah okwa ningi omupresidente.
“Inamu ninga nande epuko lakula lokukala inamu hoolola Nandi-Ndaitwah,” ta ti.
Shaningwa okwa yelifa ta ti Nandi-Ndaitwah ina kulupa ashike oku na ondjungu nounongo wokulela oshilongo.
Efiku olo, ovanhu ve li 27 ova alukila koSwapo okudilila keengudu da yooloka. Shaningwa okwe va tambula ko nomutima wa manguluka. Simon Amunime ou a li omupopiliko woAffirmative Repositioning (AR) okwa kumika ovanyasha va hoolole oSwapo momahoololo aNovomba. Amunime okwa alukila koSwapo konima eshi a denga o-AR ongola.
-fhamalwa@nepc.com.na