Auleria Wakudumo
Ongudu yoIndependent Patriots for Change (IPC) oya ti oya uda nai eshi vati oshitukulwa shaMusati inashi hala va tula omapulakata ongudu yavo keepaala dolusheno meedoolopa ngaashi Outapi, Okahao, Ruacana noTsandi.
Omukwatelikomesho wokuxwaxwameka omahoololo wo-IPC Israel Kanyemba okwa ti ongudu yavo oya pula epitikilo komalelo eedoolopa adishe da tumbulwa metetekelo opo va tule omapulakata ngaashi hashi ningwa shito.
Nonande vati va landula omilandu odo di na okulandulwa opo va pewe epitikilo, Kanyemba ota ti natango omalelelo eedoolopa inaa hala oku va pa epitikilo nokuwete tava kwata efimbo lihapu oku va pa omanyamukulo.
“Otu udite oshinima shi li ngaha shi udifa nai shaashi okwa li twa teelela ouyuuki u longifwe moikwamhungu yopapolitika,” Kanyemba ta ti.
Kanyemba okwa weda po ta ti eshi tashi va limbilike osheshi kutya konima eshi va kala nokupula enyamukulo komalelo eedoolopa, ova ka mona ashike eshi eedoolopa da tameka okutula po omapulakata eengudu dimwe omanga voo itava nyamukulwa.
“Paife ohatu lipula omapulo ngeenge navo ova shikula tuu ondjila oyo i na okushikulwa ile vo omolwashike itava pewa omhito,” Kanyemba ta pula.
Okwa ti ove na eshiivo kutya okupewa epitikilo u tule omapulakata ongudu meedoolopa okwa kwatela mo oshili, nokuyandja omhito kukeshe ongudu opo i mone omhito i tulike omafano ayo.
Kanyemba okwa ti omalelo eedoolopa oo e na oshinakuwanifwa okukala va kwashilipaleka kutya eengudu dopapolitika adishe otadi pewe omhito shi fike pamwe.
“Ohatu pula opo ovanhu va tale nawa oshinima eshi ndele tava yandje oumbangi kutya eengudu adishe ohadi talwa ngoo ngeenge tashi ya kokunateka omapulakata meedoolopa,” Kanyemba ta ti.
Eedoolopa dihapu oda ti inadi mona natango omaindilo eengudu dopapolitika tadi pula epitikilo opo di tule omapulakata avo modoolopa.
Omupopiliko welelo lodoolopa yaKahao, Victoria Haihambo okwa ti ombelewa inai mona natango eindilo nande olongudu imwe.
Ombelewa ihai anyene eengudu dopapolitika okutula omapulakata shaashi keshe ongudu oi na oufemba okutula omapulakata avo.
“Ohandi indile keshe ongudu ya hala okutula omapulakata opo i tule mo eindilo okudja kombelewa, Haihambo ta ti.
Omupopiliko wodoolopa yaShikuku John Siloiso okwa ti odoolopa yaShikuku opo ya mono vati eindilo longudu yo-IPC mo26 Septemba tava pula epitikilo opo va tule po omapulakata okudja 16 Kotomba 2024.
Siloiso okwa ti Oshikuku opo tashi tula moilonga eindilo longudu yo-IPC.
“Inatu pa natango o-IPC enyamukulo, nongeenge ova pewa enyamukulo nena ohatu ke va ulikila kutya otava tula ko omapulakata avo ngahelipi keepala dolusheno modoolopa,” Siloiso ta ti.
-wakudumoauleria@gmail.com