Auleria Wakudumo
Omupresidente wongudu yo-All People’s Party (APP) Ambrosius Kumbwa okwa udaneka kutya ngeenge ongudu yaye oya hoololwa, otai ka tunga oshiputudilo shopombada osho tashi ka kwafela oitukulwa ine moshilongo.
Ta popi pepitifo lomanifesto yongudu Olomakaya, Kumbwa okwa ti kutya oshiputudilo shopombada otashi ka kwafela oitukulwa ine oyo ya talika ko onga eedjo dounamapya moshilongo. Oitukulwa ongaashi Kavango East, Kavango West, Zambezi nOshikoto.
Oitukulwa ei oya pumbwa elongo lopombada kombinga younamapya.
Kumbwa okwa weda po ta ti nonande oitukulwa ine ya talika ko onga eedjo dounamapya moshilongo, natango vati oitukulwa oya taalelwa kondjala, oluhepo oshoyo okuhe na oilonga moshilongo.
Oitukulwa ngaashi Kavango West, Kavango East noZambezi oya talika ko onga eedjo dounamapya shaashi oi na omadu mayamba, ohava mono odula ihapu notava dulu okulongifa omeva okudja momulonga nokulonga oikulya ya wanena oshilongo ashishe.
“Oudjuu osheshi ashike epangelo inali hala okuyambidida nokuyambula po oitukulwa oyo i na omaliko notai dulu okukwafela oshilongo ashishe,” Kumbwa ta ti.
Meenghundafana naKundana, Kumbwa okwa ti ondungediladilo yavo itai tongola oitukulwa ya wedwa po moshilongo, ashike otava tameke noitukulwa oyo ya didilikwa koluhepo, ondjala osho yo okuhe na oilonga moshilongo.
“Ohatu ka enda atu wedele ko oitukulwa moshilongo opo tu hange elalakano letu, okushonopaleka omwaka pokati kovakwanaluhepo novakengeli,” Kumbwa ta ti.
“Oitukulwa imwe ngaashi Kunene, nayo oya talika ko onga oitukulwa i na oluhepo nondjala i li pombada ashike inai divilika ngaashi ikwao,” Kumbwa ta ti.
Nande ongaho, Kumbwa okwa ti otava ka tala va li koitukulwa ngaashi Kunene.
Kumbwa okwa ti okuninga omapekapeko nokudeula ovakwashiwana ohashi tula pombada okueta po oikulya neepelesenta 20% nokukwafela okuya pombada monakudiwa.
“Tu tweni omukumo ovanyasha novakulukadi okupitila mokulongela kumwe paku va pa oimaliwa yokutota eengeshefa osho yo omakwafo opaungoba opo va yambulupo eeproyeka dounamapya,” Kumbwa ta ti.