Omulumenhu weedula 34 okwa kwatwa po molwaashi a xwika po eenduda meumbo eshi vati ina fiilwa ouvalelo kuina weedula 71.
Oshiningwanima osha ningwa komukunda Oondjo dha-Naango moshitukulwa shaShana mexuliloshivike efimbo loufiku.
Omupopiliko wopolifi moshitukulwa shaShana Chief Inspector Thomas Aiyambo okwa hokolola ta ti omulumenhu ou okwe ya keumbo a dilila keendingosho lwopotundi 20h30.
Okwa hanga ina e lipyakidila nokuteleka ouvalelo novatekulu vaye.
Otaku hokololwa kutya okudja opo omufekelwa okwa tameka ta pula ouvalelo, ye ta tanguna.
Opolifi oya hokolola tai ti omufekelwa okwa kufa po nokuli ombiya oyo kwa li i li pomafiya ta ti kutya meumbo itamu telekwa shaashi iha fiilwa eendya.
Ina okwe mu pula opo a shune po ombiya pediko molwaashi okwa li va hala okuteleka ouvelelo wavo.
Otaku hokololwa kutya okudja opo omulumenhu ou okwa tema onduda yaye yokunangala omundilo.
Ina novatekulu vaye ova kuwa ndele ovashiinda tave ya keumbo lavo.
Opolifi oya hokolola tai ti ovashiinda ova hanga omundilo wa yaka konduda natango imwepo.
Meenduda odo da yaka omundilo omwa pila omaliko ayeshe.
Kape na omunhu a lopoptwa a monena oshiponga momundilo molwaashi ovaneumbo ova hangika ve li pondje.
Otaku hokololwa kutya omulumenhu ou efiku olo natango okwa li ta twikile nokuningila ina omatilifo kutya oku na okutwikila nokuxwika po eenduda dihapu.
Fiyo opapa kape na ouyelele ngeenge omufekelwa ou oku na oudu wopamadilaadilo.
Ota holoka momhangu nomakonako opolifi otaa twikile moshikumungu eshi.
Opolifi oya kumaida oshiwana opo shi xulife po okukwata omundilo ngeenge va dja keendingosho shaashi osha nyika oshiponga.
Oshiwana osha kumaidwa opo shi kale tashi lopota omahepeko omomaumbo pefimbo.