Charles Ndeumane

Omuwilikindjayi gwehangano lyoAnti Corruption Commision (ACC) Paulus Noa okwa ti okulundulula nenge okuthindila mo ooveta nomilandu itaku kwatha lela mokukondjitha uulingilingi ngele aantu itaya lundulula omitima nomadhiladhilo gawo.

Noa okwa popi ndhoka momutumba gwopashigwana gwokutalulula omikalo dhokukondjitha uulingilingi ngoka gwa li mOutapi moshitopolwa shaMusati ohela. Omutumba otagu gandja uuyelele kombinga yomasindano oshowo omashongo ngoka ga taalela etulomiilonga lyomikalo dha yooloka dhokukondjitha uulingilingi tadhi ithanwa National Anti-Corruption Strategy and Action Plan (NACSAP) 2021/2025 pamuthika gwoshitopolwa.

“Ngele omukuluntusikola ota vulu okuyaka po iimaliwa yosikola nenge ndi tye oku yi pungulula mpoka ya nuninwa otashi ulike kutya omadhiladhilo gomuntu ngoka kage li mpoka ge na okukala. Oto adha omunambelewa muuministeli wuunamiti nonkalonawa yopantu ta vulu okuya sigo oponkatu yokuyaka po ohauto ndjoka ya landwa yaafuti yiifendela opo yi kwathele uuministeli. Mbika iinima hayi ningwa, iihauto otayi yakwa muuministeli wuunamiti, iimaliwa yosikola otayi yakwa po muuministeli welongo nosho tuu,”osho Noa a popi ngaaka mokavidio hoka ka longithwa konzokundaneki ya-NBC.

Noa okwa ti Anti Corruption Commission okwa kwata po aalongisikola moWindhoek mboka ya yaka po iimaliwa ya pewa uuministeli welongo kiilyo yawo mehumokomeho. Anuwa yimwe yomiimaliwa mbyoka oya li ya nuninwa okulandela uunona wuukadhona moosikola uututa.

“Omuntu ta ningi iinima yoludhi ndoka otashi ku ulikile ashike kutya omadhiladhilo ge nomalalakano ge oga puka. Omilandu nooveta opo dhi li ndhoka itaadhi pitike omaihumbato goludhi ndoka, ashike natango aantu otaye dhi piti ashike pooha”. Noa okwa ti Anti Corruption Commission otaka kutha onkatu a ungaunge naantu ayehe mboka taya piti ooveta nomilandu pooha opo ya longe iilonga yuulingilingi, okuza kuuministeli mboka haya longele sigo naanaa okaakuluntu yawo miilonga.  –mrndeumaneraycharles@gmail.com