Kakukutu komatanga gopolisi yaNamibia Joseph Shikongo okwa ti opolisi yaNamibia oya ilongekidha ethimbo kehe okuthindikila oshigwana uuna sha humbata oshimaliwa oshindji, itaapa pulwa ofuto.
“Otwa hala okuhulitha po iiningwanima tayi holoka moshilongo muka yomunyeka, oshoka otwa hala oshigwana shi kale sha gamenwa nokukala sha manguluka,” ta popi ngaaka.
Ta gwedha po kutya iimbuluma oya ninga ooyindji, unene ethimbo ndika lyu uka kehuulilo lyomumvo onkene oshigwana otashi kumagidhwa shi kale uupathi ethimbo kehe.
Shikongo okwa kumagidha ngaaka konima omukiintu gumwe a yakulwa oshimaliwa N$400 000, koWindhoek. “Otaku hokololwa kutya omukiintu ngoka okwa li a kutha oshimaliwa shoka mositola yimwe yi li kOkuryangava, nokwa li a landulwa sigo omegumbo koAcademia,” ta hokolola ngaaka.
Shikongo okwa ti, ota tengeneke kutya yamwe yomaaniilonga oyo ya landitha po omuhona gwawo, oshoka otashi ulike kutya aafuthi mboka oya li ye na uuyelele awihe ya pumbiwa.
Ta ti, opolisi otayi longo nuundhiginini okukonga aafuthi mboka opo ya dhitikwe.
Opolisi moshitopolwa shaShana nayo oya li ya ndhindhilike aafuthi taya longo ya itula mo unene miitopolwa ayihe yokoonooli, noya kumagidha oshigwana shi kale sha tonata sho shi kale shi na oonomola dhopolisi dhomeendelelo.
Omukuluntu gwopolisi moshitopolwa shaShana Naftal Lungameni Sakaria okwa ti, oombudhi odha ninga odhindji mondoolopa yaShakati, Ongwediva oshowo Ondangwa, onkene oshigwana osha pumbwa okukala sha kotoka kehe mpoka shi li.
“Opolisi yaShana oya ilongekidha aluhe okuyambidhidha oshigwana uuna sha lopota omaupyakadhi ngele sha ponokelwa kookalyamupombo mboka taya yuugu oshigwana,” tayi ti ngaaka.
Opolisi oya popi ngaaka konima ya ningi ethimbo tayi lopotelwa iiningwanima yoludhi ndoka tayi indjipala mondoolopa, unene tuu mbyoka yoositola naantu taya yugwa iimaliwa kookalyamupombo.
“Otandi kumagidha oshigwana shi longele kumwe nopolisi opo kehe gumwe a kale e na onomola yopolisi, opo shi lopote kehe shimwe tashi holoka moshitopolwa,” Sakaria ta ti ngaaka. Ta ti, opolisi oya ilongekidha ethimbo alihe, okugamena oshigwana.
Onomola yomeendelelo yopolisi 081 363 0666 .