ONDANGWA – Elelelo lyondoolopa yaNdangwa Etitano olya kutha ko oongaku sho lya opaleke ondoolopa ayihe koonono. Pethimbo lyoshikonga shika omugandji gomauyelele gondoolopa ndjoka Petrina Shitalangaho-Mutikisha, okwa li a kunkilile nomuthindo kutya ekako oshinima oshiwinayi onkene uuyogoki nawu kale oshinima shotango.
Ta ti, eopaleko ndyoka hali ningwa omumvo kehe, olya li lya longekidhwa nelalakano lyokukaleka ondoolopa ya yela.
“Uuyogoki owa simana onkene oshigwana oshi na okukala tashi opaleke omalukalwa gasho osho wo omidhingoloko dhasho opo ku yandwe omikithi tadhi vulu okupitila moongaga,” ta popi ngaaka.
Ta kumagidha oshigwana shaNdangwa kutya, nashi kale sha tula uuyogoki komeho.
“Ondi inekela kutya kehe gumwe okwa hala ondooloopa ndjika yi hume komeho, pamukalo gwomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka.
Shitalangaho-Mutikisha okwa kumagidha oshigwana kutya, esiku ndyoka inali kala olyo tali opalekitha ondoolopa yaNdangwa, ihe nashi kale onkalondjigilile noshiholelwa shokwoopaleka aluhe.
Ta gwedha po ta ti, okwa nyanyukilwa aakalimo yomOndangwa sho ya kutha ombinga okwoopaleka ondoolopa yawo. “Ondoolopa yetu oyo yimwe yomoondoolopa dhomonooli ya yela, onkene otandi kumagidha aakalimo ya tsikile nomayihumbato gokukaleka po uuyogoki,” ta kumagidha ngaaka.
Ta popi ta ti, aantu nomahangano oya kutha ombinga mokwoopaleka ondoolopa shoka sha ulike ethano ewanawa.
Uuministeli womidhingoloko, iihwa nomapashiyano okuza oshiwike sha zi ko owa kala nokukumagidha oshigwana oshilongo ashihe shi opaleke omalukalwa gawo. Uuyogoki oshinima sha simana onkene oshigwana oshi na okukala tashi pewa omalongo nokukumagidhwa kombinga yuuyogoki okukeelela omikithi tadhi vulu okutaandalekwa koongaga.