Omulukupe weedula 68 pamwe novatekulu vaye owa fiwa pomutenya eshi eumbo lavo la pya po filu filu.
Oshiningwanima osha ningwa mexuliloshivike komukunda Oshilao moshitukulwa shaHangwena efimbo loufiku.
Ota ku hokololwa kutya meumbo omwa pya eenduda omuwoi mwa kwatelwa oikulya noidjalomwa.
Omupopiliko wopolifi moshitukulwa shaHangwena Warrant Andreas Nghiyolwa okwa hokoleka ta ti ka pena omunhu a lopotwa a xulifa ile a monifwa oshiponga.
Ovaneumbo aveshi ova faduka po pefimbo eshi eenduda da haka omundilo.
Opolifi oya hokolola tai ti omundilo owa tameka konima eshi ounona va fiya oikuni ya tema pendiko.
Okudja opo okwa dja omhepo ndele omundilo tau tandevele wau ka keenduda adishe meumbo.
Oshivike sha djako koshitukulwa shaHangwena okwa lopotwa okaana kokamati keedula nee ka xulifila moshiponga shomundilo omanga okamatyona keedula hetatu oka monifwa oshiponga.
Ota ku hokololwa kutya oshiningwanima osha ningwa efimbo loufiku omo kwa li ounona ve li meumbo pehe na omukulunhu.
Nakuxupa moshiponga okwa ka kendabala okufaduka po auka pondje ashike mukwao ine shipondola okudja mo monduda.
Kansela woshikandjohoololo shaEenhana Olivia Hanghuwo okwa ti ombelewa yaye otai ka kwatafana novanhu va ninga oihakanwa yomundilo nokukala a ninga omalongekido okuyambidida.