Charles Ndeumane
Aalumentu yaali mositopolwa shaMusati oya ponokele omulumentu gwomimvo 31 ndele taye mu dhenge nomamanya komutse noku mu thanga. Nakuninga oshihakanwa okwa hulitha esiku lya landula.
Opolisi yaMusati oya lopota kutya omulumentu omukalimo gwomomukunda Omindaba Paulinus Shiwana Immanuel okwa hulitha sho a dhengwa nomamanya lwiikando oyindji komutse nokuthangwa kaafekelwa yaali, gumwe omunamimvo 33 nomukwawo omunamimvo 24.
Oshiningwanima shoka osha ningwa ongulohi yOlyomakaya ga zi ko lwopotundi 22H00 molukanda lwaShetu momukunda Omindaba B moshitopolwa shaMusati. Anuwa nakusa okwa dhengwa nomamanya lwiikando oyindji komutse sigo ta gwile po, naafekelwa oya tsikile noku mu thanga.
Nakuninga oshihakanwa anuwa okwa falwa koshipangelo kOutapi nokonima yethimbo okwa lundululilwa koshipangelo shaShakati hoka a hulithile ongula yOsoondaha, nomudhimba gwe ogwa falwa kokila yopolisi yaShakati opo gu ka konakonwe.
Pethimbo lyoonkundathana Inspector gwopolisi moshitopolwa shaMusati Anna Kunga okwa ti uuyelele wi ihwa po kombinga yaashoka sha eta oontamanana otawu ka za mo konima yomakonakono gopolisi, ashike anuwa aafekelwa oya li kohi yiikolitha.
“Ponkatu mpaka opolisi inayi mona uuyele kombinga yaashoka sha eta opo oshiningwanima shoka shi ningwe, ashike osha kwatela mo elongithonayi lyiikolitha. Aakwanezimo yanakusa oya tseyithilwa, nomakonakono gopolisi otaga tsikile moshipotha shika,” Kunga ta ti.