Moupupu na mouzeu wozombura esere mu avihe mbi mavi zemburukwa nokunyanderua oupenda nokupanḓera kovaṱi novakuru va Vitoto.

Indji ondjari ombuze yokotjikoro pomazemburukiro wozombura esere rozondekurona zOtjiṱiro Otjindjandja tjOvaherero okuza motumbo twohangauti okutjindira kOvitoto tji va za nokukaundurirwa i youhonapare wohuurire. Okupanḓera wina ondari rimwe rwomambo omahongonekwa yomazemburukiro wozombura esere zorutjindo rwa Vitoto. 

Omazembukiro nga yari Oroviungura nda zuko tji ya ri 12 ku Seninaṋi, wina ndi ri eyuva rongwatero yombara ya Vitoto, Vipuira Kapuuo. Posi ya ngu hi na wa karere po mena rwoungundipare womuinyo. Nungwari imbi ovitjitwa avi kara ko otja tji vya tyerwe. Ovasembamise amave yaruka mozondambo zovaṱi novakuru vawo zokupanḓera. 

Moruhoze rwokuzemburuka ohangauti yohuurire yEhi rwOvandoitji ngandu koyozomburu, wina omazemburukiro nga nu rimwe rwomambo omahongenekwa womazemburukiro wozombura esere mwari omaundjiro. Oruhoze ndari ndwa raisirwe wina nembo nongumbiro yokupaturura i yomuhonge Elvis Tjivasera ngwa resere komambo woruhoze ekondwa oritjaine. Ne ye yauza nongumbiro yOmbara Otjitambi yOvaherero, omuyaruke Hosea Kuṱako, ndji tja: “ozombandje ze nomina nu ozonḓera ze noviruwo nungwari Omuna wOmundu ke na pe twa otjuuru”. Ngari omambo ovahungire ovengi ngaave tamuna okuutira pomapatururiro nongumbiro ngandu kembo esenina rwOmbara Kapuuo nda yandjerwe i yOngenerara Field Marshall Matheus Hijanḓonḓu Hukura, eye wina nguri orata motjirata tjombazu tjOvaherero mOvitoto. Ae hi na wa zembire imbi oviṱiṱi wina ohoromende ya Namibia ekutuke mbi ya ungurira Ovitoto. 

‘Ngu undja ongu muna outoṋi’ nu otja kurimwe rwomambo omahongonekwa womazemburukiro wozombura esere zorutjindo rwa Vitoto, ndiri omaundjiro, onganda indji Karibu Kwetu Solar Trading, ndjiri onganda yorutjeno rweyuva, ya tanda okuyeta orutjeno rweyuva mOvitoto. Tjazumba otjimariva tji matji zu mokurandisa orutjeno indwi kovature tji mai ungurisa nokutunga natjo osikore yotjiwaṋa.