Charles Ndeumane
Ongundu yoAffirmative Repositioning (AR) oya pititha ompangela yayo mwaashoka ya hala okuningila Namibia ngele epangelo olya yi momake gayo.
Ompangela ndjoka oya li ya pitithwa mehuliloshiwike moshitopolwa shaZambezi.
Omuleli gwoAR Job Amupanda okwa ti itaya ningi ashike omahwahwameko nelalakano lyoku mona omawi momahogololo ashike
“Otwa uvaneka kutya otatu kondjitha opo omusinda omutiligane guze po, ngele owa tala paife oshikumungu shoka oshili mompangu. Otwa tseyitha ompangela yetu yoku tunga uupale uyali womaudhano wopashigwana, omasiku ashike ngaka onda talelep o ehala mpoka twa thaneka tu ninge okapale kamwe moKongola moshitopolwa shaZambezi,” Amupanda ta ti.
Ongundu yoAR oya uvaneke kutya otayika tulapo openzela yuuhanona tayi pewa ooyina mboka kaayena iilonga okuza pevalo lyokanona sigo otaka gwanitha omvula. Omanga aakiintu mboka yeli mefudho lyetegelelo otayaka pewa oondjambi dhayo dhi ihwapo uule woomwedhi hamano. AR anuwa otaka kuthapo iifendela mbyoka hayi nanwa kiimaliwa yopenzela opo aakwati yopenzela yamone iimaliwa yayo ayihe.
Muuyelele womwaalu ogundji gwaanyasha kaayena iilonga, AR okwa ti epangelo olya ndopa okundhidhilika aalwangwantu ayehe moshilongo nonande uuyelele okowuli kiiputudhilo yelongo lyopombanda. Anuwa epangelo lyoAR otalika ndhidhilika aalongwantu ayehe moshilongo opo yamonenwe oompito dhiilonga okupitila moshinyangwadhalwa shaalongwantu.
Anuwa epangelo lyoAR otali ka etapo oompito dhiilonga ndhoka itaadhi pula ontseyo yasha opo naamboka inaaya mona elongo lyopombanda yamone oompito dhiilonga.
Ngele otashiya koshikondo shuunamiti, pauyelele wa pitithwa koAR konyala oopelesenda 80 dhAanamibia ohaya yakulwa kaapangi noongohotola dhili kohi yoopelesenda 40. Omayalulo oga ulike kutya aapangi yatatu ohaya kwathele konyala aavu yeli 1000. Anuwa epangelo lyoAR olya thaneka okugwedhela omwaalu gwaaniilonga yuuhaku, oshowo omwaalu gwiipangelo mwakwatelwa uupangelo uushona opo kehe oshikandjohogololo shikale shina uupangelo utano nenge wu vulepo.