Auleria Wakudumo
Ovalumenhu vavali ova xulifa moshiponga shotuwa omanga vatatu va tambulilwa moshipangelo eshi va mona oshiponga, vavali va ehamekwa unene, naumwe ina ehamekwa unene.
Oshiningwanima osha ningwa efimbo lokeengulasha po 03h25 mondjila yaNdangwa nOngwediva, popepi no Select Service Station mOngwediva.
Oonakufya ova tongolwa ovo Johannes Maruru na Valde Abel. Omupopiliko wopolifi moshitukulwa shaShana Inspector Thomas Aiyambo okwa koleka oshingwanima eshi.
Okwa hokolola ta ti oshiponga osha etwa konima eshi omushingi wotuwa a nyengwa okupangela osheendifo, tashi uko kopate ndele noku alangata oikando ihapu.
Maruru oo kwali omushingi okwa xulifila poshiponga omanga Abel aka xulifila koshipangelo.
Vatatu aveshe ovali ovatwaalelwa okudja kOshakati va yuka kOngwediva.
Oshiningwanima shikwao, olutu lomulumenhu weedula 28, omukwashiwana waCongo oleli tuwa la ninga nai monduda yaye kolukanda hali ifanwa Nau-aib, mOkahandja. Oshininganima osha ningwa Etitano, lwopo 13h00.
Omupopiliko wopolifi, Omupedu Commissioner Kauna Shikwambi okwa koleka oshiningwanima eshi.
Shikwambi otati vati olutu la James Kiala, onhauki yokokamba Osire Refugee Camp oleli tuwa kovashiinda vopeeduda davo, va limbililwa eshi inave mu mona oule womafiku atatu.
Vati ovashiinda shaye ova kufa onghatu vaye monduda yaye konima eshi olutu laKiala la tameka okutwa edimba.