Ofikola Gosen Combined School oya teywa kookalyamupombo efimbo loufiku Olomakaya nokuvaka mo omaliko.
Oshiningwanima osha ningwa komukunda Onyati moshitukulwa shaShikoto.
Omupopiliko wopolifi moshitukulwa shaShikoto Chief Inspector Ellen Nehale- Kangulu okwa koleka ta ti mofikola omwa vakwa oinima ngaashi eekompiuta mbali, omangelengele noshoyo oinima imwepo.
Okwa weda ta ti mombelewa omwa kufwa noshimaliwa keemuna N$730. Okwa hokolola ta ti ovafekelwa ova teya omuvelo wombelewa ndele tava i mo. Oinima aishe ya vakwa oi li pongushu yoshimaliwa eeN$26 000.
Kape na omufekelwa a kwatwa po nomakonakono opolifi otaa twikile. Kangulu okwa pula oshiwana opo shi longele kumwe nopolifi okuyandja ouyelele kombinga yovafekelwa avo. Okwa kumaida oshiwana opo shiha lande oinima ya vakwa. “Omunhu keshe ta landifa oinima ihe na eembapila na lopotwe kopolifi opo a dule okukala a kwatwa po,” ta ti.
Okwa kumaida oshiwana opo shi kale sha kotokela omaumbo avo unene tuu pefimbo ovanhu vau ka pomatango manene.