Charles Ndeumane 

Elelo lyondoolopa yaShikuku olyi ipyakidhila nolweetho olutitatu lwomauliko giipindi ngoka ga tamekele momasiku 29 October notaga hulu momasiku 2 Novemba 2024. Shika osho oshikando shotango omauliko giipindi ngoka taga kwatelwa komeho kelelo lyondoolopa yaShikuku. 

Minista gwemona Iipumbu Shiimi ngoka a li omupopi a simana pepatululo pambelewa lyomauliko ngoka okwa ti omauliko giipindi ngoka otaga ulike eitulemo lyepangelo mokumangulula Aanamibia paiyemo. 

“Ongoonkambadhala dhepangelo lyetu okumangulula aantu yetu paiyemo, elelo lyondoolopa yaShikuku olya eta po omauliko giipindi ngaka opo li gandje ompito kumeme ngwiya ta landitha iikulya niikunwa, kuku ngwiya ta hondjo oohema nomizalo dhopaumuthigululwakalo, osho wo komunangashefa opo te ya a ulikile aalandi iilongongwa ye,” Iipumbu ta ti. 

Mayola gwondoolopa yaShikuku Julia Endjambi okwa ti nduka olweetho olutitu lomauliko giipindi gondoolopa yaShikuku ashike osho oshikando shotango elelo lyondoolopa tali ga unganeke. Iikando iyali ya zi ko oga li ga unganekwa kehangano lyiipindi lyaShikuku. 

“Tangi unene kehangano lyiipindi lyaShikuku sho mwa pala ondjila yomauliko giipindi moka tatu ende nena. Olweetho lwonuumvo olwo lwotango elelo lyondoopa yaShikuku tali unganeke omauliko giipindi moka elelo lyi na ekwatathano lyuukilila naakwashigwana. Olweetho nduka olu li kohi yomuhingo “Oshikuku tashi eta po oompito dhehumokomeho lyopankalathano niiyemo kaapindiki,” Endjambi ta ti. 

Endjambi okwa ti omauliko giipindi gonuumvo otaga lalakanene okuhila aanangeshefa okuza koombinga dha yooloka, oku ulika oompito dhongeshefa ndhoka ta dhi monika ashike mOshikuku, oshowo okuyambula po iiyemo yaakalimo yomOshikuku. 

“Otandi indile aakuthimbinga ayehe, aalandithi oshowo aakalimo yomOshikuku mu tsikile nokuyambidhidha omauliko giipindi gaShikuku ngoka ta ga ka kala mokalindeli kelelo lyondoolopa. Ondoolopa yaShikuku otayi humu ashike komeho okupitila meyambidhidho nekuthombinga lyeni,” osho Enjambi a ti. 

-mrndeumaneraycharles@gmail.com