Auleria Wakudumo
Oshiputudilo shopombada shehongo, Unam osha yandja omayambidido ongushu yoN$170 000 koshikunino shovakwashiwana vomolukanda Evululuko mOshakati.
Unam okwa yandja ekwafo okupitila moproyeka yaye yedina Nourishing Spaces, oyo ya totwa po mo2017.
Omukalelipo waUnam Ndeyapo Nickanor okwa hokolola ta ti okwa didilikwa oluhepo meedoolopa tali i pombada molwomwaalu wovanhu vahapu tau di komikunda, tava kongo ouxupilo.
Nickanor okwa holola kutya oproyeka yavo okwa li i na okuxula mo2020, ashike omolwetukuluko loCovid-19, ina dula oku ya komesho ngaashi sha dilaadilwa.
Osho sha eta oshiputudilo shi ninge omapekapeko omoule kombinga omaludi okulonga oikulya osho yo omikalo hadi longifwa moikunino yomeedoolopa momalukanda omo muna ovanhu hava mono oyuuyemo i li pedu moshilongo.
“Omapekapeko okwa ningwa momukalo wokupula ovakwashiwana vomolukanda omapulo, okupula ovanambelewa vepangelo, nakeshe oo ta dulu okukufa ombinga,” Nickanor ta ti.
Nickanor okwa weda po ta ti okutala vati oikulya ihe na oudjolowele osho yo omalunduluko mahapu mokulonga oikulya, oproyeka oya tokola opo i kwafele momukalo wokuyandja oilongifo yoshikunino.
Ngoloneya woshitukulwa shaShana Elia Irimali okwa holola ta ti odoolopa oya mona omwaalu muhapu wovanhu tava di moikandjohoololo ihapu ya dingilila Oshakati. Okwa ti ovanhu vahapu ohava fikile modoolopa yaShakati.
“Elondo lomwaalu wovanhu ohali eta yoo omwaalu wovanhu vehe na oilonga u ye pombada,” Irimali ta ti.
Irimali okwa weda po ta ti eemhito doilonga dihapu modoolopa opo tadi i pombada, di dule okutambula ovanailonga vahapu.
“Ohandi indile opo keshe umwe a fimaneke nokukufa ombinga momapekapeko taa ningwa momidingonoko detu.
Okukufa ombinga ohaku kwafele okuyambula po eenghalamwenyo detu,” Irimali ta ti.
Okwa weda po ta ti okukufa ombinga nokupopya osho ve shi kombinga yoshikunino ouwa wavo, shaashi ouyelele ohau ka longifwa okumona omakwafo taa dulu okulundulula eenghalamwenyo davo.