Onational Unity Democratic Organisation, Onudo, mai yarurapo omausemba wehi rwotjizeero wOvanamibia mba pandjara ehi mokuriyekwa kohuurire nOtjiṱiro Otjindjandja. 

Kehi yohoromende yayo ndji mai tja Oyouyara wOmbwiro yOtjiwaṋa ovisepambinḓu mu vya kara norupa pu maru utire nokuyandera Onudo mai raisa nao otja tjiva zotuyano twayo morutuu rwatjo rotuyano komatoororero wOperesindenda nOuṋepo wOmbongarero yOtjiwaṋa omayandero womueze mbu mau yende, mburi Tjikukutu. 

Ovakwatera vomahi wozonganda kave na kuyandjerwa okukara nouini wehi nousemba mbu ri po nai wokukara nouini wehi mau zemisiwa. Ehi arihe mari tuwa kehi yondjeverero yehi kutja ri haṋuṋunwe pokainya ku avehe. 

Omarandisiro wehi rwouṱuta kutja omapaturuke kotjiwaṋa atjihe poo okombirivate kaye na okuyandjerwa ndoovazu opereisa iri kehi yonḓengu yehi ndo. Nozopereisa maze kara nopoṋa pu maze utire nu pu ze hi nokururuma otja konḓengu yehi rwotutumbo novikunwa. Mai sembamisa Okomisi yOmakotorero Wehi rOtjizeero ndji mai ungura nomaningira waimba mbu mave vanga ehi rawo rotjizeero ve ri kotorerwe kutja otjiungura hi tji rire otjisopoke notjoporuhaera. 

Oviwaṋa mbya pandjara ehi mena rOtjiṱiro Otjindjandja mavi tuwa peke kuvyo ovini tjikweya komahandurisiro. Ma rire ouatjiri kutja ohoromende tji ya randa ehi romahandurisiro, otjiungura tjo ku handurisa movandu tji hakahanisiwe okupenga omanyanyauriro woviungurisiwa ngunda amu hi ya handurisiwa movandu nokuyandjera kutja omayandjero wozosarama kovahandurisiwa yerire omasopoke nowoporuhaera. Amaye kayenda pu nombatero kutja imba mba hiti muyo ve yenene okuuta okunikora.