Omboronganeno yOzombara zOvaherero nOvambanderu, wina nḓe tjiukwa otjozombara za Kandjoze, za yakura nokupa ohauzeu koumune womahi nge wira kehi yomboronganeno ndji ungurira ombwiro yayo ayehe, ndji tjiukwa otjOcommonwealth.
Omahi inga yotjiuru tjawo nai nguri Ombara Charles wehi ndi Ounited Kingdom (UK), yari nomahaameno wawo wombura woviuru vyomahi nga oitja 27 mOapia mokoverwa inga Osamoa oure wotjiveke okuza tji ya ri 21-26 komueze mbwa zuko, Seninaṋi. “Oukarere nomarandisiro wovakarere, mu mu nomarandisiro wovakarere okutuurunga mokuvare ingwi Otransatlantic, omaumba omayaukise momakuruhungi wovautwa, ku ku he ri mena rouyaukise wavyo uriri nungwari wina mena rondondo pu vya sembamisiwa tjinene mokuhina kunatja novaihamisiwa,” omahi maye munu nao amaye panḓere kozongutiro nomazeva pekepeke nandarire wozombongarero zomuhoko omikutasane mu mu na yayo ndja haamene mOdurbana mOsouth Afrika ndjari ohunga nombangu.
“Oukarere nomarandisiro wovakarere ongatukiro youndu nu okuza kohapo pa sokutja pa ri nao, tjinene omarandisiro wovakarere okutuurunga mokuvare ingwi Otransatlantic”.
Munao oviuru vyomahi inga, tjinene inga wa Afrika ngari kongotwe youmune imbwi ngunda ingo warwe tjimuna OUK aya harere okuyepayepa epu indi, otji maye ningirire otjihungiriro tjotjisuta nohepero yatjo tjinga omengi wawo aya ṱunwa i youkarere mbwi. Amaye munu kutja oruveze rwa horo kouatjiri mbu ha paterwa pendje motjiṋa tji mokutanda oruyaveze ronḓikasaneno. Amave yanisa okuhungirira kotjiṋa hi okuzamba.
Umwe wOvahaamise worutu oruungurire po rozombara, Mbakumua Hengari, ma yakura oumune womahi nga amatja mai hitasana nondando yawo okutwara ongondjero yotjisuta tjOvaherero nOvakwena pondondo yarwe youye. Okuiisira kokutja mombura yomaundjiro indji o-2024 omaundjiro wawo otjozondekurona oku twa otjiposa pondondo youye.
Okurongerera ombura ndji o-2025 Oruwano rwa Afrika ndu rwa tya kutja Ombura yOtjisuta otja kombongarero ndjari motjihuro ohongora tja Ghana, Oacra.
Hengari otji ma munu kutja nambano nai Oministera yOviposa Vyopendje ya Ghana, Shirley Ayorkor Botchwey, tji ma rire omutjangerepo omunene worutu ndwi, oviṋa mavi yendayenda. Ne mu zerirepo ouṋingandu ama undjire ko omaungurire omawa kumwe naye norutu ndwi mongondjero yotjisuta mu mu na itji tjOvaherero nOvakwena.