Opolifi moshitukulwa shaShana oya kwata po ovanhu 42 molwaashi va dopa okufuta outekete vehandukilo lekayulonyanga mopate.

Otaku hokololwa kutya ovanhu ova kwatwa po Etitatu.

Omupopiliko wopolifi moshitukulwa shaShana Chief Inspector Thomas Aiyambo okwa koleka ta ti oonakukwatwapo aveshe ova dja modoolopa yaNdangwa, vo ovalumenhu.

Okwa ti omakanda aa okwa li a pewa omahandukilo okufuta oshimaliwa shonhumba shoutiketa vomopate.

“Opolifi oya didilika ovanhu kave hole okufuta outiketa vavo pefimbo. Osha puka ngeenge omunhu ite liufa komilandu da tulwa po kopolifi,” ta ti.

Okwa ti unene tuu ovalumenhu ovo unene va didilikwa vehe hole okufuta oshimaliwa shoutiketa vavo molwaashi ova dina oilonga yopolifi.

Aiyambo okwa yelifa ta ti omunhu ngeenge ta pewa ehandukilo lokufuta okatiketa oha pewa omafiku ahapu nelalakano lokukala e lilongekida okukonga oshimaliwa.

“Opolifi otai longo oilonga yayo pehe na oulingilingi okukala ya yandja ehandukilo lopaveta komunhu keshe ou ite liufa komilandu,” ta ti.

Okwa kumaida ovanhu opo va fimaneke omilandu dopolifi nokukala va pula ouyelele keembelewa dopolifi ngeenge va pewa outiketa.

“Ovanhu nava fute outiketa wavo pefimbo opo ku kelelwe omunhu ta kwatwa po,” ta ti.

Aiyambo okwa ti ngeenge omunhu okwe ke lihanga e na oupyakadi pefimbo a pewa okatiketa okwa manguluka opo a kale a kwatafana neembelewa dopolifi.

–fhaamalwa@nepc.com.na