Auleria Wakudumo
Ehangano lokuandjeneka omeva loNamWater ola holola tali ka kandula po oshikumungu shepato lomeva nenota osho sha taalela onooli oivike momwedi waKotoba.
Oshana, Ohangwena nOshikoto oyo unene oitukulwa ya kala ya taalelwa kenota olo la etwa komatomhelo a yooloka – she likolelela komatomhelo a yandjwa koNamwater.
Modoolopa omeva okwa kala haye uya ashike oule wokafimbo ndele taa shuna vali. Ovakwashiwana, unene ovanangeshefa vanini ova holola tava ti ova kanifa shihapu moule woivike ivali ya ka pita, omo omeva haa shuna oo ta eya efimbo lihe shiivike.
Ovanangeshefa, unene ovalandifi voukuki noupana ova holola tava ti shaashi omeva ohaye uya efimbo lihe shiivike, fimbo limwe momaumbo ihamu hangwa ovanhu va teke omeva, vo va dule okulunga oukuki vongeshefa yaye.
Onghela, elelo lodoolopa yaNgwediva ola pitifa onhumwafo tai shiivifile ovakalimo vomodoolopa yaNgwediva osho yo eenhele da dingilila odoolopa ta li ti elelo ola taalela omashongo mokuandjakaneka omeva, noudjuu oo vati kave shi kutya otau kwata efimbo lifike peni.
Omupopiliko wodoolopa Otilie Shingenge okwa ti otava longo noudiinini opo va kandule po oudjuu womeva.
“Omeva otaa kala haa pate efiku keshe, opo a yandje omhito yokuyada keendama domeva odo hadi andjakaneke omeva modoolopa nopoushiinda,” Shingenge ta ti.
Elelo ola kunghilila ovakwashiwana opo va teke omeva, opo va dule okulongifa ngeenge a pate.
Moshitopolwa shaHangwena, omeva okwa ninga oule wefimbo a pata. Eefikola dihapu oda kala tadi lumbu nenota shaashi omeva a pata. Eenhele dimwe ovakwashiwana ova holola tava ti omeva okwa kala hae ya ashike oufiku, nefiku alishe okwa pata.
Omupopiliko waNamWater Lot Ndamanomhata okwa kwashilipaleka kutya omunino womeva oo wa li wa topa mOhangwena owa longwa, nomhumbwe oyo ya kala ya taalela oshitukulwa oya kandulwa po.
“Omunino oo wa li wa topa owa enda koshi yeumbo, naashi osha eta ovakwashiwana vomOmafo fiyo Omakange osho yo oshitukulwa shaHangwena koonono shi kale shihe na omeva,” Ndamanomhata ta ti.
Oule wefimbo olo omeva a pata, eenhele ngaashi oipangelo, eefikola noupangelo vanini okwa li va pewa omakwafo opakafimbo osho yo eenhomola deengodi oko tava dulu okupula omakwafo oo.
Pehovelo laKotoba, ouministeli wounamapya owa kwafela okukandula po oupyakadi, nokuandjakaneka omeva nomaloli.
Omikunda 300, eefikola, oipangelo, noitaasi yopolifi oya kumwa komhumbwe yomeva mOshikoto, oule wefimbo.
Natango, ominista younamapya, omeva nomatalululo omadu Calle Schlettwein okwa holola ta ti oshilongo osha pumbwa omikalo da yooloka meendelelo opo ku kalekwe po omeva.
Schlettwein eshi okwe shi holola Etivali, peyandjo lomauyelele kombinga yokukwatela po omeva.
Otwa pumbwa okuninga omapekaapeko ekandulepo lomhumbwe yomeva. Otwa pumbwa okuninga omatokolo e li mondjila nokuninga omapekaapeko,” Schlettwein ta ti.
-wakudumoauleria@gmail.com