LUHONONO – Kalilimo zeñata bashemi mwalibaka zetibiswa kimezi amuunda upa wa sikiliti sa Zambezi, sihulu mwa silalanda sa Kabbe neba tokwiswa buloko kikutokwa maino kwa banababona habaya kwasikolo. Baituti nebana ni kuyo ina mwalibulututu zakuikahela. Nako yamuunda neba nyanda hahulu mi nebana ni kufuluha kuliba kwa sikolo. 

Zeo kaufela sekaba matangu kwa bayahi basilalanda sa Luhonono ni minzi yeli bukaufi, kasamulamo akukwalulwa simubuso kwa muyaho wamalobalo abaituti wamayemo apahami kwa sikolo sa Schuckmansburg.

Mubakweli Mueteleli wanaha Netumbu Nandi-Ndaitwah naizo kwalula simubuso muyaho ono yahilwe kasinyehelo ya masheleñi alikana bolule ba mwanda kabasilezi (N$106 960 688) Labutanu. Nandi-Ndaitwah naize kukwalulwa kwamuyaho kitiululo yetuna kwa sicaba sa Luhonono mi ikaba sibaka sa buiketo ni silelezo kwa baituti.

 “Kachenu halukwaluli feela muyaho wamalobalo, sina hamuziba kuli muyaho ocwana utisa zende zeñata. Sapili mukapila bukaufi ni sikolo, hamusana kuzamaya misipili yemitelele, mi hape mukaba mwa silelezo. Kacwalo luswanela kuipona kuli luna ni litohonolo ni kuitumela kuli mubuso waluna ki mubuso otokomela,” nabulezi.

Hala zeñwi muyaho una ni malobalo abasizana ni malobalo abashimani, mandu abazamaisi ba muyaho, liapehelo, muyaho wakucela, matapelo ni limbuzi. Mubakweli mueteleli wanaha naelelize baituti kubabalela muyaho nikubona kuli hakuna masila moba lobala. “Baituti baswanela kukenisa moba lobala isi kuli mutu usili ato mi keniseza, hakuswaneli kuba cwalo,” neku elelize Nandi-Ndaitwah.

Mwa manzwi ahae liikwambuyu watuto Anna Nghipondoka naize natomohile pilu hane akile apotela sikolo sa Schuckmannsburg mwasilimo sa 2021 hatobona mone balobala banana. “Neni lobehile pilu hanitobona mwanana walilimo zesilezi apila mwasibulututu kusina pabalelo ya mushemi, nabato lotisa miyoko, kakuba likwambuyu ni mushemi wamusali. 

Neli kalibaka leo neni ngile taba ya litokwahalo za baituti ba Schuckmansbug kuba ya butokwa ni kubona kuli bafumana muyaho obaswanela mokuna ni silelezo sakata,” nabulezi. Nalumbile kampani ya August 26, kakufeza kuyaha muyaho mwanako yene lumelelanwi ya lilimo zepeli.