Tuuda Haitulab, museums omkhâis mâisab ra mîsa !oas ge !hao!nāsi ǂhunumâsiba ra ǁgauǂui ǁgauǁgaun di oahā-ūhes ǁîn di ǂhunuma !hūgu ǁgasa, ǁaruhā-ūs ǀguisa ǁgau tama hâ, xawe ǁnāti ī !ēs gagasise tsî sorosise ǂurus dis tsî ǁkhawa sa !hao!nāsib ǀkha !hūǁaresa ra mā. 

Haitulab ge Museumdi !Gaeǁares Namibiab dis tawa omkhâisens mâisase a sîsenxa. ǁÎb ge mîs ge, nēti ra oahā-ūhe xūna !norasase sâuǀgaras !aromadi Namibiab di museumdi tsî ǀnîpa nî hâdi tsîn hoana !oega nî aiǂhomitoasa !khaisa. 

“Nē mâsib ge ǀhûhâsiga ra ǁāǁā ǁîn di ǀumide ǂhunumase hō-oa tsî ǁîn aixan ǀkha !hûǁare tsî ǁî-i a taris di khoesisa !goaxa surigu !aroma ǀgaiǀgai tsî ǁawoǁawo ǁkhāsa. 

Namibiab !nās !aroma nau Afrikab ǁaedi !nâ i īs khami, i di ge !hoaǁaredi ǂhanu tamase ge !gû xūna ǁkhawa !gâi!gâis dide a ǁgariǁgarisa,” tib ge ge mî. 

Haitulab tsîn ge ǁnā khoen ǀgūǁae ge Paris, Franse !hūb dana!ās !nâ hâ i sîsenǁareǁkhāǁkhāsensa ǁhao!nâ hâ in di ǀgui ge i, hîa !hūgu di ǂhunuma !hao!nāsi ǁgauǁgauxūna oahā-ūs tsî gowab mâ ǂhâǂhâsa !âsa nē mâsigu !nâ ra ǀhurus ai gere ǂâi-aiǂnûi. 

Sîsenǁareǁkhāǁkhāsens nēs ge !hao!nāsib ǁkhāǁkhāsenaon, museumde ra !khōdana khoen tsî !hao!nāsi ǂansaben hoa !hūbaib a ǂhabase hân xa ge ǁhao!nâhe hâ i, tsî ǀgaisase ǁgâiǀāb ǁaegu !nâ ge !hūga a ǀhanahe ǂhunuma !hao!nāsi xūn di ǁkhaeǁnâhes ai gere ǀgonǀgon!gao. Nē ǀhaos ge Pense ren langues – Thinking in Languages ti a ǂansa ǂnûiǂgās xa, TheMuseumsLabs ǀkha !hûǁare hâse ge ǀaweǁguihe hâ i. !

Uru ǁgūbas ân nē !hao!nāsi daoba ǂhanuse !gûtsoatsoasa gere ǀgonǀgon!gaose. ǁKhāti ǂâisa gere ǂnûi-aihe !âb ge ǂhâǂhâsasib museumdi ra ǀhuruba, !nae!khaide !khōǂgā hâse a ǂhanu xūn xa tsî ǁîna sâuǀgarasa, ǀumis di !âbas ra mâǀoa amaga. 

Haitulab ge Franse !hūb ǁga īs ge ǁîb !aroma gowaba !hao!nāsib !nâ tsî ǀumisa !khōǀgaras !nâ ra mâǂoa xūse ība īsa. ǁKhātib ge ǁîba a mîs ge, museumdi ga tā ǀumixūna !ûi!gâ tsî sâuǀgaras !aroma ǀgui  aiǂhomisa hâsa, xawe ǀhûhâsigu ǀkha ǁgamǁaredi !nâ hâǀgara tsî ǀumisa ǁawoǁawos ga a !uruse īsa.