ONGWEDIVA-Opolisi moshitopolwa shaShana oya londodha oshigwana opo shi ikaleke kokule niimbuluma pethimbo lyomatango omanene, ndyoka lwa taalelwa. Moonkuundathana noshifonkundaneki shika, omukuluntu gwopolisi mOshana, Commissioner Naftal Lungameni Sakaria okwa ti, oya ilongekidha okulwitha iimbuluma oshowo okutaalela omaupyakadhi taga ka holoka pethimbo ndyoka.
Sakaria ta ti yo itaya ka thiga nando emanya lya londa kekwawo. “Nonando twa ilongekidha ethimbo alihe, otwa tegelela manga omahogololo gopashigwana ga hule opo tu tameke noopatolola ngaashi hatu longo shito ethimbo lyomatango omanene,’’ ta fatulula ngaaka.
Sakaria okwa ti, omasiku omawanawa gokomumvo omanga taga ende guuka popepi oya hala oshigwana shi kale shili uupathi ethimbo alihe. Ta ti uushinda nawu kale wayaga kesipa ethimbo ndyoka. “Lombwela mushiinda shoye kutya oto thigi po egumbo lyoye kaali na omuntu nenge u konge omuntu a kale megumbo lyoye ngele oto yi kefudho,” Sakaria ta kumagidha ngaaka.
Sakaria okwa pula wo aanamagumbo opo ya lombwele oongundu dhokutonatela pomaushiinda dhoneighborhood kutya otaya zi po.
Okwa pula wo oshigwana opo shi longithe otekinologi yi li ko mwa kwatelwa ndjoka hayi kwatha aantu opo ya mone shoka tashi inyenge momagumbo gawo taya tala koongodhi dhopeke.
“Omateyo gomagumbo moshitopolwa shaShana ogali ga shuna pevi okuyelekanitha nethimbo lya piti nonando ga kala taga holoka mpeya naampeya,” ta po pi ngaaka.
Ta ti, okuna omukumo kutya natango pethimbo lyokili iimbuluma itayi ka indjipala otayika keelelwa oshoka omiya dha shinana otadhi ka kala dha homata.
Sakaria okwa ti, oya dhidhilike kutya aafuthi ethimbo ndyoka ohaya kala yahala unene oohauto dhoka hadhi tutu iimaliwa moositola, ashike okwa ti moshitopolwa shaShana shoka itashika holoka mo.
“Ndyoka olyo ethimbo aantu oyendji taye ya okutalela po aakwanezimo yawo, oshowo nokuya komahala gaatelelipo. Iiponga yomoondjila oshowo iimbuluma oyindji ohayi holoka pethimbo lyomatango omanene,” Sakaria ta ti ngaaka. Ta ti, opolisi oya ilongekidha, okukaleka po omalandulathano agehe gomoondjila, okukeelela iiponga oshowo okugamena oshigwana okulongelwa omiyonena.