Charles Ndeumane
Minista gwuunamapya nuuniimuna, omeya netulululo lyevi Carl Schlettwein okwa ti uuministeli ota wu kutha ko omavi goofaalama dhimwe ndhoka dha li dha gandjwa kaashi li pauyuuki pethimbo lyuukoloni noku ga topolela Aanamibia shi ikolelela koompumbwe dhawo.
Schelettwein okwa ti ethimbo lyuukoloni olya etitha etopolo lyevi inaa li talwa nawa moka aantu yamwe ya li ya pewa omavi onene noonkondo omanga oyendji kaaye na omalukalwa.
Muuyelele mboka uuministeli owa kala uule woomvula ta wu ninga omathaneko noompangela nkene omavi ngoka gena oku tulululwa noku topolelwa aantu pauyuuki, nongashingeyi anuwa uuministeli owu li poonkatu dha hugunina lela opo wu tameke oku andjakaneka omavi ngoka.
“Onga oshilongo otwa tula po omilandu omipe metopolo netulululo lyevi oshoka ou na iilalakanenwa yi nasha netulululo lyevi mbyoka ta yi kwashilipaleke kutya evi ota li topolelwa aantu shi hike pamwe shi li momisindalandu ndhoka twa tulapo atuheni,” Schlettwein ta ti.
Minista okwa tsikile ta ti etopolo lyoofaalama ota li ka tala tango kaakalimo yomiitopolwa moka dhi li mboka ta ya ka pewa oopelesenda 70 dhevi omanga oopelesenda 30 ta dhi ka topolelwa Aanamibia oku za kiitopolwa yilwe mboka ya pumbwa evi.
“Etulululo lyevi olya simana noonkondo nolya guna Aanamibia ayehe.
Elalakano enene lyomilandu dhetu dhetulululo lyevi oku pukulula omilandu omiwinayi ndhoka dha thigilwe moNamibi komapangelo guukoloni lya Shouth Africa, oshowo epangelo lya Germany.
Aanamibia naye shi taleko onga ondobe yombili nuukumwe moka omithigululwakalo nesimano lyowo lyopantu ta li yambulwa po” Schelttwein a ti.
Schlettwein okwa ti uuministeli owa hala oku kwashilipaleka kutya oofaalama ndhoka ta dhi tulululwa ota dhi tsikile nenge dhi tameke oku eta po sha opo etulululo li hwepopeke oonkalamwenyo dhaamboka ta ya pewa omahala.
Anuwa aaniilonga yomoofaalama mboka ta ya ka kanitha iilonga molwa omatulululo ngoka ota ya ka pewa omalukalwa moofaalama ndhoka uuna ta dhi tulululwa.
Omavi otaga ka topolwa momikalo ndatu dha yooloka, opuna aantu mboka ta ya ka pewa omavi ga gwana oofaalama oonene, mboka ta ya ka pewa omavi ga gwana oofaalama dhuunene wopokati, naamboka ta ya ka pewa omavi ga gwana ashike oku ninga omalukalwa gawo.